Хасан Қасымбаев сот залында айыпталушыларға арналған орындағы пластикалық терезені сындырып, шу шығарды, деп хабарлайды Tengrinews.kz тілшісі. Оқиға үкім жарияланардан шамамен жарты сағат бұрын болған.
Дереккөздің мәліметінше, Қасымбаев пен басқа айыпталушылар сот залында журналистердің болуына наразылық білдірген.
"Мына журналистердің бәрін шығарыңдар!" – деп айқайлаған Қасымбаев ашуға беріліп, айыпталушылар орнындағы пластикалық терезеге соққы берген.
Салдарынан әйнек сынған, ал сынықтар залдың ішіне шашылған. Оқиға сәтін түсіруге мүмкіндік болмаған, себебі айыпталушылардың туыстары камера кадрына түсіп қалмас үшін сол маңайды көлегейлеп қойған.
Оқиғадан кейін сот қызметкерлері журналистер мен операторларды залдан дереу шығарып жіберген.
Алматы облыстық сотының баспасөз хатшысының айтуынша, бұқаралық ақпарат құралдарының өкілдері олардың қауіпсіздігі үшін шығарылған.
