Балтық теңізінде НАТО-ның оқу-жаттығулары басталды
2025 жылғы 5 маусымда Германияның Росток қаласында (Мекленбург – Алдыңғы Померания жері) НАТО-ның Балтық теңізіндегі Baltops 25 әскери-теңіз оқу-жаттығулары басталды. Бұл туралы АҚШ-тың Алтыншы флоты мен НАТО-ның әскери-теңіз соққы күштері мен қолдау күштерінің баспасөз қызметі мәлімдеді, деп хабарлайды Malim.kz.
Бұл — Балтық операцияларының 54-рет өткізіліп отырған нұсқасы.
Оқу-жаттығуларға НАТО-ға мүше 16 елден 40-тан астам кеме, 25 ұшақ және шамамен 9 000 әскери қызметкер қатысуда.
«Биылғы Baltops – жай ғана жаттығу емес. Бұл – біздің одақтастығымыздың табандылығы мен теңіздік қуатын айқын көрсететін қадам», – деді АҚШ-тың Алтыншы флоты мен НАТО-ның соққы және қолдау күштерінің қолбасшысы, вице-адмирал Джеффри Томас Андерсон.
Оның айтуынша, Baltops 25 НАТО күштерінің теңіздегі бірлескен әрекет ету қабілетін көрсетеді.
Оқу-жаттығуларға Германия, Дания, Италия, Латвия, Литва, Нидерланды, Норвегия, Польша, Португалия, Ұлыбритания, АҚШ, Түркия, Финляндия, Франция, Швеция және Эстония қатысуда.
Маневрлерге десанттық операциялар, артиллериялық атыс, әуе және минаға қарсы қорғаныс, сүңгуір қайықтарға қарсы іс-қимыл, жарылғыш заттарды залалсыздандыру және медициналық әрекет ету кіреді. Сонымен қатар, су үсті және суасты дрондары пайдаланылады.
Операцияны Еуропа мен Африкадағы АҚШ әскери-теңіз күштері мен Алтыншы флот басқарады. Басшылық НАТО-ның Португалияның Оэйраш қаласындағы соққы және қолдау күштері штабы арқылы жүзеге асырылады.
Оқу-жаттығулар 20 маусымға дейін жалғасады.
Айта кетейік, Baltops маневрлері 1972 жылдан бері жыл сайын өткізіліп келеді. Негізгі мақсаты – Балтық аймағында құрлық, әуе және теңіз операциялары шеңберінде НАТО күштерінің дайындық деңгейін тексеру.
Фото: Stefan Sauer/dpa/picture alliance
Ең көп оқылған
