БАҚ: Украинадағы соғыста 219 мың ресейлік сарбаз қаза тапты
Ресейдің Украинаға қарсы соғыстағы адам шығыны 2025 жылғы тамыз айының соңындағы мәлімет бойынша шамамен 219 мың адам болды. Мұндай деректерді мұрагерлік істер тізілімін зерттеген "Медуза" және "Медиазона" басылымдарының бірлескен тергеуі келтіреді, деп хабарлайды Malim.kz.
"Медиазонаның" мәліметінше, ерлер арасындағы өлім-жітім рекорды – аптасына шамамен 3 мың адам – 2024 жылғы қарашада тіркелген. Бұған себеп ретінде журналистер әскери қызметшілерді хабар-ошарсыз кеткен немесе қаза тапқан деп тану туралы Ресей соттарына жаппай арыздардың түсуін атап өтеді.
РФ соттары күн сайын 250-ден астам адамды хабар-ошарсыз кеткен немесе қаза тапқан деп таниды. Бұл майдандағы күнделікті шығынға сәйкес келеді.
"Көбіне бұл арыздарды Қорғаныс министрлігінің өкілдері береді – оларға әскери тапсырмада жоғалған (шындығында қаза тапқан) сарбазды жеке құрам тізімінен шығару қажет", – деп жазады "Медиазона".
Журналистердің пайымдауынша, Украинадағы соғыстың әр жылы Ресей армиясының шығыны күрт өсіп келеді. Мәселен, 2022 жылы майданда шамамен 20 мың ресейлік қаза тапса, 2023 жылы – 50 мың, ал 2024 жылы – 93 мыңға жуық адам көз жұмған.
BBC-дің орыс қызметі, "Медиазона" және волонтерлер ашық деректер негізінде жүргізіп отырған Украинадағы соғыста қаза тапқан ресейлік әскери қызметшілердің тізімінде биылғы тамыздың соңына қарай 125 681 адам бар. "Медиазонаның" жазуынша, бұл көрсеткіш барлық шығынды қамтымайды, өйткені әрбір өлім дерегі жария бола бермейді.
Ресей билігі Украинадағы соғыстағы қаза тапқандар мен жараланғандар саны туралы ресми дерек жарияламайды.
Ал 14 шілдеде АҚШ президенті Дональд Трамппен кездесуде НАТО-ның Бас хатшысы Марк Рютте 2025 жылдың басынан бері Ресей армиясы Украинада 100 мың сарбазынан айырылғанын мәлімдеді. Ал сәуір айында НАТО ресейліктердің 250 мың қаза тауып, 650 мыңнан астамы жараланғанын хабарлаған.
Вашингтондағы Стратегиялық және халықаралық зерттеулер орталығының (CSIS) бағалауынша, 2022 жылдан бері Украинадағы соғыста қаза тапқан ресейлік әскери саны 250 мың адамды құрайды.
CSIS дерегінше, Украина жағынан 60 мыңнан 100 мыңға дейін әскери қаза болған.
Фото: Aliona Kardash/Stern
Ең көп оқылған
