Мадагаскарда әскери төңкеріс: Армия билікті өз қолына алды
Мадагаскарда қарулы күштер елдегі мемлекеттік биліктің әскери кеңестің бақылауына өткенін ресми түрде мәлімдеді. Кеңес құрамына армия, жандармерия және ұлттық полиция өкілдері кірген. Бұл туралы президент Андри Радзуэлина елден қашып кеткеннен кейін бір тәулік өткен соң мәлімдеді, деп хабарлайды Malim.kz.
«Біз билікті өз қолымызға алдық», — деді полковник Майкл Рандрианирина.
Әскерилердің шешімімен Мадагаскар Конституциясының күші уақытша тоқтатылды, ал барлық мемлекеттік институттар, тек Ұлттық ассамблеяны (парламенттің төменгі палатасы) қоспағанда, таратылды. Билік әскерилерге өткенін жариялардан бірнеше минут бұрын депутаттар Радзуэлинаны президент қызметінен отставкаға жіберу туралы дауыс берген.
Әскери кеңес құрамына 2009 жылы Радзуэлинаны билікке әкелген CAPSAT элиталық әскери бөлімшесінің өкілдері де енгізілген.
Бұған дейін, 12 қазанда, жаппай халық наразылығының аясында Андри Радзуэлина Францияның әскери ұшағымен елден кетіп қалғаны белгілі болды. RFI радиосының хабарлауынша, бұл қадам Франция президенті Эммануэль Макронмен алдын ала келісілген.
Оппозиция жетекшісі Ситена Рандрианасолониаико президенттің шетелге кеткенін растады.
«Біз президент әкімшілігіне хабарластық, олар Радзуэлинаның елден кеткенін растады», — деді ол Reuters агенттігіне. Оның айтуынша, Радзуэлина әскерилердің көтерілісшілер жағына өтуінен кейін елден қашуға мәжбүр болған.
Дегенмен, 13 қазан күні кешке Радзуэлина Facebook желісінде жолдау жасап, отставкаға кетуден бас тартқанын, бірақ қауіпсіздігі үшін елден уақытша кеткенін мәлімдеді. Ол өзінің қай жерде екенін ашып айтпады.
Қазір оппозиция парламент депутаттарынан қол жинап, президентке импичмент жариялау бастамасын көтеріп жатыр.
Фото: Luis Tato/AFP/Getty Images
