Ғимараттар қирап, жолдарды су басты: дауыл салдарынан 16 адам қаза тапты
АҚШ-тың орталық-шығыс бөлігінде болған дауыл салдарынан 16 адам қаза тапты
АҚШ-тың орталық-шығыс бөлігінде болған дауыл салдарынан 16 адам қаза тапты, - деп хабарлайды Malim.kz Deutsche Welle сайтына сілтеме жасап.
Жергілікті билік өкілдерінің айтуынша, толассыз жауған жауын салдарынан су тасқыны болған. АҚШ-тың Ұлттық метеорологиялық қызметі (NWS) 6 сәуірде тағы да ауа райына байланысты ескерту жасады.
Арканзастан Огайоға дейінгі аумақты қамтыған дауыл кейінгі күндері ғимараттарды қиратып, жолдарды су басып, ондаған торнадоның пайда болуына себеп болған. Ең көп зардап шеккен – Теннесси штаты. Билік мәліметінше, штаттың батыс бөлігінде 10 адам көз жұмған.
"Кентукки штатында су тасқыны салдарынан екі адам қаза тапты. Олардың бірі – мектеп автобусының аялдамасына бара жатқанда су ағынына кеткен 9 жастағы бала", - деп хабарлады штат губернаторы Энди Бешир.
"Ауқымды және қатты нөсер жауыннан кенет су тасқындары күтіледі. Адамдардың өмірі мен мүлкіне елеулі қауіп төніп тұр", – делінген АҚШ Ұлттық метеорологиялық қызметінің хабарламасында.
Жергілікті билік пен БАҚ мәліметіне сәйкес, тағы екі адам Миссури мен Индиана штаттарында қаза тапқан. 6 сәуір таңындағы жағдай бойынша Арканзас пен Теннесси штаттарында 100 мыңнан астам адам жарықсыз қалған.
Фото: Pixabay.com
