Instagram жасөспірімдерге арналған жеке аккаунт енгізеді

Instagram жасөспірімдерге арналған ережелерді өзгертіп жатыр. Балалардың қауіпсіздігі үшін компания олардың посттарының көріліміне жаңа шектеулер енгізді, ал оны тек ата-ана ғана алып тастай алады.

Жасөспірімдерге арналған жаңа аккаунттар Ұлыбритания, АҚШ, Канада және Аустралия мемлекеттерінде енгізіле бастады. Еуросоюз елдерінде биыл енгізіледі. Ал келер жылы қаңтар айынан бастап басқа мемлекеттерде де пайда болады.

Жаңа ережелерге сәйкес, жасөспірімдердің жаңа аккаунттарын 16 жасқа дейінгі қолданушылар автоматты түрде алады және 18 жасқа дейінгі барлық жаңа қолданушыларға беріледі. Жас 16-ға толмаған жасөспірімдер енгізілген шектеулерді ата-анасының рұқсатынсыз алып тастай алмайды.

Ал 13 жасқа дейінгі балалардың аккаунаттарын Instagram мүлде тіркемейді.

Сонымен, жасөспірімдер үшін не өзгермек?

Жасы 18-ге толмаған барлық қолданушылар  ересектерге арналған контентті көре алмайды. Оларға автоматты түрде шектеу қойылады.

Сондай-ақ жасөспірімдердің аккаунттары жабық болады. Яғни қолданушылар барлық жазылу үшін өтінімдерді мақұлдауға тиіс, олардың посттарын тек жазылған адамдар ғана көре алады.

Түнгі уақытта жаңа посттар туралы push-хабарламалар тоқтатылады.  Жасөспірімдер әлеуметтік желіде бір сағаттан артық отырса, үзіліс алу туралы ұсыныс жіберіледі.

Одан бөлек Инстаграм сөзбен қорлауға қарсы бағытталған фильтрлар қосуға уәде етіп отыр: алгоритм жазылған сөздер біреудің ар-намысына тиеді деп тапса, онда олар пікірлер мен жазбаша хабарламалардан автоматты түрде алынып тасталады.

Жасы 16-18 арасындағы жасөспірімдер бұл шектеулерді өздері алып тастай алады, ал басқалары үшін ата-анасының рұқсаты қажет.

Баласының аккаунтын бақылау құқығын алған ата-ана оның кіммен хат алмасып отырғанын көре алғанымен, хабарламалардың өзін оқи алмайды.

Айтпақшы, алдағы жылдың қаңтар айынан бастап инстаграмның америкалық сегментінде жасанды интеллект базасында арнайы құралдар іске қосылмақ, олар өзін ересек ретінде тіркемек болған жасөспірімдерді сәйкестендіріп, анықтайды.

Фото: vzglyad.uz