Шымкентте экологиялық тұрақтылықты сақтау, су ресурстарын тиімді пайдалану, коммуналдық инфрақұрылымды жаңғырту және агроөнеркәсіп кешенін дамыту бағытында кешенді жұмыстар жүргізіліп жатыр. Бұл шаралар қаланың қоршаған ортаға түсетін жүктемесін азайтып, тұрғындардың өмір сапасын жақсартуға және ауыл шаруашылығы өндірісінің тиімділігін арттыруға бағытталған, деп хабарлайды Malim.kz.
Экологиялық бастамалардың бірі – "Таза Қазақстан" жалпыұлттық бағдарламасы. 2026 жылғы 18 сәуірде Шымкенттің бес ауданында өткен "Таза аула" акциясына 55 мыңнан астам адам қатысты. Тұрғындар, еріктілер, жастар, коммуналдық қызметкерлер мен түрлі ұйымдардың өкілдері аулалар мен қоғамдық кеңістіктерді тазалауға атсалысты. Қыркүйекте Дүниежүзілік тазалық күніне орай ұйымдастырылған жалпы қалалық сенбілікке 43 мыңнан астам тұрғын қатысып, 200-ден астам арнайы техника жұмылдырылды. Мұндай шаралар тазалықты бір реттік науқан емес, күнделікті экологиялық мәдениеттің бір бөлігіне айналдыруға бағытталған.
Қаланың экологиялық тұрақтылығы үшін су ресурстарын ұтымды пайдалану да маңызды. "Шымкент сушар" кәсіпорны 2026 жылы 520 шаруа қожалығымен, 4 заңды тұлғамен және 4500 жеке қосалқы шаруашылық иесімен келісімшарт жасасқан. Вегетациялық кезеңде 4600 гектардан астам ауыл шаруашылығы жерін суару жоспарланған. Су жүйелерінде 27 негізгі су бөлу торабы мен гидротехникалық құрылғы пайдаланылады. Негізгі міндет – суды тұрақты жеткізіп, шығынды азайту және суару жүйелерінің тиімділігін арттыру.
Сонымен қатар Шымкентте энергетикалық және коммуналдық секторды жаңғырту жұмыстары жүргізілуде. Ұлттық жоба аясында жылу, электр, ауыз су және су бұру желілерін кезең-кезеңімен жаңарту көзделген. Жылу жүйесінде 11 шақырым магистральдық желіні жаңғырту жобасы іске асырылса, сумен жабдықтау және су бұру саласында 2029 жылға дейін шамамен 73 млрд теңге инвестиция бағыттау жоспарланған. Оның есебінен 44 шақырым ауыз су және 18,2 шақырым су бұру желісі жаңартылмақ. Қала бойынша табиғи газбен қамту деңгейі 98 пайызға жеткен.
Агроөнеркәсіп саласында да оң динамика байқалады. Ұлттық статистика бюросының дерегіне сәйкес, 2026 жылғы қаңтар-тамызда Шымкенттегі ауыл шаруашылығы жалпы өнімінің көлемі 40,7 млрд теңгеге жуықтап, өткен жылдың сәйкес кезеңімен салыстырғанда 4 пайызға өсті. Қалада жалпы сыйымдылығы 125,5 мың тонна болатын сегіз заманауи көкөніс сақтау қоймасы жұмыс істейді. Бұған қоса, қуаттылығы 4,3 мың тонна болатын тауарлы сүт фермасы, екі заманауи жылыжай кешені және жұмыртқа өндіруге бағытталған екі құс фермасында өндірісті кеңейту жұмыстары жүргізілуде.
Шымкент үшін "жасыл экономика" қағидаттары тек көгалдандырумен шектелмейді. Оның мазмұнына су мен энергияны үнемдеу, инженерлік желілердің тозуын азайту, ресурстарды цифрлық есепке алу, ауыл шаруашылығына заманауи технологияларды енгізу және табиғи аумақтарды сақтау кіреді. Осы бағыттардың қатар дамуы қаланың экологиялық қауіпсіздігін күшейтіп, агроөнеркәсіптің тұрақты өсуіне және тұрғындар үшін қолайлы орта қалыптастыруға негіз болмақ.
