Үйдегі нан желініп үлгермей, қатып қалатын кездер болады. Мұндайда артығын алдын ала тілімдеп, мұздатқышқа салып қойған ыңғайлы. Malim.kz тілшісі Stop Food Waste кеңестеріне сүйеніп, нанды ысырап қылмай сақтаудың жолын ұсынады.
Қатқанын күтпеңіз
Бір бөлке нанның таусылмайтынын білсеңіз, артығын жұмсақ кезінде бөліп алыңыз. Мұздатқышқа нан әбден қатқаннан кейін салынса, еріткенде де бастапқы жұмсақ қалпына келе қоймайды.
Алдымен тілімдеп алыңыз
Нанды тұтас күйінде мұздатсаңыз, бір үзімі үшін түгел ерітуге тура келеді. Сондықтан алдын ала тілімдеп, бір жегенге жететіндей бөліктерге бөліңіз. Кейін қажетін ғана алып, қалғанын мұздатқышта қалдырасыз.
Қаптамасын мықтап жабыңыз
Нанды мұздатуға арналған пакетке немесе қақпағы тығыз жабылатын ыдысқа салыңыз. Пакеттің ішіндегі артық ауаны шығарып, аузын жабыңыз. Сыртына салған күнін жазып қойсаңыз, бұрынғысын бірінші пайдалануға ыңғайлы. Тығыз қаптама нанға өзге азықтың иісі сіңбеуіне де көмектеседі.
Тоңазытқыш пен мұздатқышты шатастырмаңыз
Нанды ұзақ сақтаймын деп тоңазытқыштың кәдімгі сөресіне қоя салу ұтымды емес: ол жерде нан тезірек қатуы мүмкін. Артығын ұзақтау сақтауға мұздатқыш қолайлы.
Осы әдеттің бір ыңғайы – дастарқанға қажет мөлшерде ғана нан шығарасыз. Қалғаны кеуіп, қоқысқа кетпей, келесі асқа сақталады.
