Ақпараттық хабарлама
freedom
Саясат Аналитика Қоғам Мәдениет Сұқбат Спорт Абай-175 Ұлттық спорт Экономика Malim podcast Inclusive society Әлем Құқық Денсаулық Тұлға-таным Кино Білім-ғылым Шоу-бизнес Әдебиет Оқиға Экология Хикаялар MALIMet

Олимпиада чемпионы мен әйгілі тарихшы: 16 қарашада кімдер туған?

MALIMet •
Олимпиада чемпионы мен әйгілі тарихшы: 16 қарашада кімдер туған?
Фото-коллаж: malim.kz\ ЖИ арқылы өңделген

16 қараша – қазақ спортына, ғылымы мен мәдениетіне үлес қосқан бірқатар тұлғаның туған күні. Олардың қатарында Олимпиада чемпионы Серік Сәпиев, тарихшы Манаш Қозыбаев және ақын Мәриям Хакімжанова бар, деп хабарлайды Malim.kz.

Серік Сәпиев – 43 жаста

1983 жылы 16 қарашада Қарағанды облысының Абай қаласында боксшы Серік Сәпиев дүниеге келген. Ол 2012 жылғы Лондон Олимпиадасында алтын медаль жеңіп алып, жарыстың үздік боксшысына берілетін Вэл Баркер кубогын иеленді. Бұған дейін 2005 және 2007 жылдары екі мәрте әлем чемпионы атанған. Сәпиев – қазақ боксының тарихында Олимпиада алтынын да, Вэл Баркер кубогын да алған санаулы спортшының бірі.

Манаш Қозыбаевтың туғанына – 95 жыл

Көрнекті тарихшы, академик Манаш Қозыбаев 1931 жылы 16 қарашада Қостанай облысының Меңдіқара ауданында туған. Ғалым Қазақстан тарихын зерттеп, бұрын ашық айтылмаған тарихи мәселелерді көтеруге еңбек сіңірді. Оның қаламынан "Ақтаңдақтар ақиқаты", "Жауға шаптым ту байлап", "Тарих зердесі" секілді еңбектер шыққан. Қозыбаев 800-ден астам ғылыми және ғылыми-көпшілік еңбектің авторы болған.

Мәриям Хакімжанованың туғанына – 120 жыл

Қазақстанның халық жазушысы Мәриям Хакімжанова 1906 жылы қарашада Қостанай өңірінде дүниеге келген. Ұлттық мемлекеттік кітап палатасының мерейтойлар күнтізбесінде ақынның туған күні 16 қараша деп көрсетілген. Ол қазақ поэзиясында ана мейірімін, әйел тағдырын, ерлік пен елге сүйіспеншілікті жырлаған қаламгер ретінде танылды. Оның белгілі шығармаларының бірі – Мәншүк Мәметованың ерлігіне арналған "Мәншүк" поэмасы. Сондай-ақ "Ана махаббаты", "Ана көктемі", "Намыс" жинақтары жарық көрген.

Бауыржан Шыңғысов – 62 жаста

1964 жылы 16 қарашада Жезқазғанда Бауыржан Шыңғысов туған. Еңбек жолын слесарь болып бастаған ол кейін кеден органдарында, өндіріс пен мемлекеттік басқару салаларында қызмет атқарды. Әр жылдары Сәтбаев пен Жезқазған қалаларының әкімі болған. Оның еңбек жолы Ұлытау өңірімен тығыз байланысты.

Ақан Әбдуәлиев – 51 жаста

Мәдениет саласының өкілі Ақан Әбдуәлиев 1975 жылы 16 қарашада Алматы облысының Шиен ауылында дүниеге келген. Еңбек жолын Сүйінбай атындағы облыстық филармонияда бастаған. Кейін өнер оқу орындарында сабақ беріп, Жамбыл атындағы Қазақ мемлекеттік филармониясын және Темірбек Жүргенов атындағы Қазақ ұлттық өнер академиясын басқарған.

Руслан Бекетаев – 51 жаста

1975 жылы осы күні Шымкентте қаржы саласының маманы Руслан Бекетаев туған. Ол Қазақстанда және Ұлыбританияда білім алған. Ұлттық банкте, қаржылық қадағалау органдарында еңбек етіп, Қазынашылық комитетін басқарған. 2014–2021 жылдары Қазақстанның қаржы вице-министрі қызметін атқарған.

Әскер Піриев – 51 жаста

Кәсіпкер, қоғам қайраткері Әскер Піриев те 1975 жылы 16 қарашада дүниеге келген. Экономика және менеджмент бағытында білім алып, кәсіпкерлікпен айналысқан. Көпшілікке "Ахыска" түрік этномәдени бірлестігіндегі қоғамдық қызметі арқылы таныс.

Ұқсас мақалалар

Жылдам сілтемелер
Іздеу