Фото: Зеркало
Мәскеуде сейсенбі күні таңертең тұрғын үйдің жанында жарылыстан Ресей Қарулы күштерінің радиациялық, химиялық және биологиялық қорғау әскерінің басшысы Игорь Кириллов пен оның көмекшісі қаза тапқанын ТАСС агенттігі хабарлады.
Ресейдің Тергеу комитеті 17 желтоқсанда Мәскеудегі Рязан даңғылында «тұрғын үйдің кіреберісіне жақын тұрған самокатқа орнатылған жарылғыш құрылғы іске қосылғанын» растады.
Жарылыстан генерал-лейтенант Кириллов пен оның көмекшісі қаза тапты.
Генерал Ресейдің Украинаға қарсы соғысы басталғаннан кейін кеңінен танымал болды, ол үнемі журналистерге арналған брифингтерде сөз сөйлеп, Киевтің химиялық және биологиялық қару жасаумен айналысқаны туралы негізсіз мәлімдемелер жасаған.
54 жастағы Кириллов 2017 жылы сәуірде радиациялық, химиялық және биологиялық қорғау әскерінің басшысы болып тағайындалды. Ол Тимошенко атындағы Радиоактивті химиялық және биологиялық қорғаныс әскери академиясын бітірген. 2017 жылға дейін осы академияны басқарған.
Кирилловтың қаза болған жерінен жарылғыш құрылғының компоненттері алынған. Агенттіктің дереккөзі құрылғының қуаты шамамен 300 грамм тротилге тең екенін айтады.
