Мьянмада болған жойқын жер сілкінісінен қаза тапқандар саны 2056 адамға жетті, ал жарақат алғандар саны 3900-ден асты, деп хабарлайды Malim.kz dw.com сайтына сілтеме жасап.
Елде бір апталық қаралы күн жарияланды.
AFP агенттігінің хабарлауынша, зілзаладан үш күн өткен соң үйінділер астында қалғандарды тірі табуға үміт аз. Құтқару жұмыстарын 40 градусқа дейін жеткен аптап ыстық қиындатып отыр.
Мандалай қаласында, яғни жер сілкінісінің эпицентріне жақын аймақта, ыстықтың салдарынан қаза болғандардың денелері тез шіри бастаған. Бұл олардың тұлғасын анықтау процесін күрделендіруі мүмкін, деп атап өтеді агенттік.
Айта кетейік, 28 наурызда Мьянмада магнитудасы 7,7 болатын бірнеше күшті жер сілкінісі тіркелді. Оның жерасты дүмпулері Тайланд, Қытай және Вьетнамда да сезілген.
Бангкокта (Тайланд астанасы) 30 қабатты аяқталмаған ғимарат опырылып құлады. Жалпы, Тайландта 19 адам қаза тауып, 75 адам із-түзсіз жоғалғандар тізіміне енген.
Фото: REUTERS
