Павел Дуровтың ағасы да тұтқындалатын болды

Франция билігі Telegram бас директоры Павел Дуровты ғана емес, оның ағасы әрі құрылтайшыларының бірі Николайды да тұтқындауға санкция берген. Бұл туралы Politica басылымы жазды, деп хабарлайды Malim.kz.

Politico-ның Франция әкімшілік құжаттарына сілтеме жасай отырып жазған материалында Telegram қызметін жасырын тергеу өте ауқымды жүріп жатқаны және бірнеше ай бұрын басталғаны айтылған. Одан бөлек, мақалада бұл істің Telegram-ның балаларға қатысты жыныстық зорлық-зомбылық туралы француз полициясының тергеуімен ынтымақтастықтан бас тартуына да байланысты екені айтылған.

Ал ағайынды Дуровтарды қамауға алу туралы ордер Telegram мессенджердің пайдаланушысын анықтау туралы сот сұрауына «жауап қатпағаннан» кейін берілген. Құжат сонымен қатар, басқа да жағдайларда француз және еуропалық билік органдарымен Telegram ынтымақтастығының мүлдем жоқтығын атап өткен.

Павел мен Николайды қамауға алу туралы ордерлер 2024 жылдың 25 наурызында «ұйымдасқан топтың құрамында кәмелетке толмағандардың порнографиялық бейнелерін сақтауға, таратуға, ұсынуға немесе ұсынуға жәрдемдесуді» қамтитын айыптар бойынша берілген.

Айта кетейік, Telegram желісінің авторы, миллиардер Павел Дуровтың Парижде ұсталғаны туралы бұған дейін жазған едік. Ол әуежайдағы әуе көлігі жандармериясының қолына түскен.
Фото: life.ru