Ауғанстандағы "Талибан" қозғалысының билігі шахматты ислам нормаларына қайшы деп танып, ресми түрде тыйым салды, - деп хабарлайды Malim.kz тілшісі sovsport.ru-ға сілтеме жасап.
Олардың пікірінше, шахмат – құмар ойындардың бір түрі және олардың діни сеніміне сәйкес келмейді.
Бұрынғы шахмат федерациясының атқарушы директоры Абасин Мохибидің айтуынша, кейінгі он бір айда бірде-бір ресми турнир, семинар немесе шахматқа қатысты іс-шара өткізілмеген. Көптеген федерация қызметкері елден кетіп қалған.
"Кейбір елді мекенде шахмат ойнауға толық тыйым салынды", – деді ол.
Жергілікті шахматшылар спорт департаментіне турнирлер өткізуге рұқсат беру және федерацияны қолдау туралы өтініш жасаған. Алайда оларға жарлық бар екені және осы жарлыққа сәйкес шахмат федерациясы құқықтық мәртебесінен айырылғаны, ал шахмат "харам", яғни дін тұрғысынан тыйым салынған іс-әрекет болып саналатыны хабарланған.
Ауғанстанда қазір 11 титулды шахматшы бар, олардың бесеуі – FIDE шебері, алтауы – спорт шеберіне кандидат.
Фото: Pixabay.com
Байланысты жаналықтар
MalimBlocks
