Қытай америкалық тауарларға 34% мөлшерінде "жауапты баж салығын" енгізетінін жариялады. Бұл туралы 4 сәуірде ҚХР Қаржы министрлігі хабарлады. Reuters агенттігі бұл шешімді Вашингтон мен Бейжің арасындағы сауда соғысының ушығуы деп бағалады.
Жаңа тарифтер 10 сәуірден бастап күшіне енеді. Бұған дейін, 2 сәуірде, АҚШ президенті Дональд Трамп Қытайдан импортталатын тауарларға қосымша 34% мөлшерінде баж салығын енгізу туралы шешім қабылдаған болатын.
"АҚШ-тың әрекеттері халықаралық сауда ережелеріне сай келмейді, Қытайдың заңды құқықтары мен мүдделеріне айтарлықтай нұқсан келтіреді және классикалық біржақты бопсалау практикасы болып табылады", – делінген Қытай Қаржы министрлігінің 4 сәуірде жарияланған мәлімдемесінде.
CNN арнасының хабарлауынша, Трамп билікке қайта оралғаннан кейін Қытайдан келетін барлық импортқа екі кезеңмен 10%-дық қосымша тарифтер енгізген. Ақ үй бұл шараны АҚШ-қа заңсыз фентанил ағынын тоқтату үшін қажет деп түсіндірді. Осылайша, қазір АҚШ-қа импортталатын қытайлық тауарларға жалпы 54% мөлшерінде тариф салынған.
Reuters мәліметінше, Қытай – әлемдегі ең ірі экспорттаушы ел. Ол жаһандық нарыққа басқа кез келген мемлекетке қарағанда көбірек тауар жеткізеді. АҚШ-қа жыл сайын 400 млрд доллар көлемінде қытайлық өнім экспортталады.
Фото: STEPHEN SHAVER/IMAGO
MalimBlocks
