Трамп-Зеленский кездесуі: Украина НАТО-ға қабылданбайды
Бүгін Ақ үйде Украина мен АҚШ президенттерінің кездесуі өтті, деп хабарлайды Malim.kz.
Келіссөздер Сопақ кабинетте ұйымдастырылды. Олардың барысын Еуропа мұқият бақылап отырды. ЕО елдерінің көшбасшылары алдын ала Киевті қолдайтынын мәлімдеп, Мәскеуге аумақтық жеңілдіктер бермеуге шақырды.
Зеленский Ресеймен үшжақты келіссөздерге қатысуға дайын екенін растады. Трамп: «Бүгін не келісім болады, не болмайды» деп атап өтті.
АҚШ президенті атысты тоқтату енді міндетті шарт емес екенін айтты. Оның сөзінше, ұзақмерзімді келісімге «нақты мүмкіндіктер» бар.
Трамп Украина ешқашан НАТО-ға мүше болмайтынын қатаң айтты. Бірақ Киевке балама әрі «өте жақсы» қауіпсіздік кепілдіктерін ұсынды. Ол Еуропа бірінші қорғаныс шебі болып қала беретінін, ал АҚШ оған көмектесуге дайын екенін жеткізді.
АҚШ басшысы Владимир Путиннің соғысты тоқтатуға ниетті екеніне сенетінін айтып, бүгінгі кездесуден кейін онымен нәтижелерді талқылауға уәде берді.
Зеленский президенттік сайлау өткізу мүмкіндігін жоққа шығармайтынын, бірақ тек қауіпсіздік жағдайы қамтамасыз етілсе ғана екенін айтты. Территориядан бас тарту мәселесін түсіндірмеді.
Трамп күн соңына дейін АҚШ әскерін Украинаға орналастыру туралы шешім қабылдайтынын жеткізді.
АҚШ Киевке ауқымды қауіпсіздік көмегін көрсетуге дайын екенін растады.
Сондай-ақ Трамп Зеленскийдің костюміне мақтау айтты, ал бұған дейін оның сырт келбетін сынаған журналист кешірім сұрады.
Вашингтондағы кездесу тараптардың бейбіт шешім іздеуге дайын екенін көрсетті. Келесі қадам – Трамп пен Путиннің келіссөзі.
Фото: видеодан кадр
Ең көп оқылған
