Украина Қырымды шабуылдап, үш тікұшақты жойды
Украина Қорғаныс министрлігінің Бас барлау басқармасының (БББ) «Примары» («Елес») арнайы бөлімшесі Ресейдің үш көпмақсатты Ми-8 тікұшағын және 55Ж6У «Небо-У» радиолокациялық станциясын жойды, деп хабарлайды Malim.kz БББ Telegram-арнасына сілтеме жасап.
Ведомство жойылған Ми-8 тікұшақтарының бірінің суретін жариялады.
Ресейлік тарап әзірге жағдайға түсініктеме берген жоқ.
Сонымен қатар, Украина Қарулы күштерінің Әуе күштері Telegram-да хабарлағандай, 21 қыркүйекке қараған түні РФ Украинаға 54 соққы жасайтын дронмен (Shahed, «Гербера» және басқа түрлері) шабуыл жасаған.
Ауадан шабуыл Курск, Миллерово, Брянск және Ресейдің Приморско-Ахтарск аймақтарынан басталған.
Шабуылды тойтаруға авиация, зениттік-зымыран әскерлері, радиоэлектрондық күрес бөлімшелері, дронға қарсы жүйелер мен Украина Қорғаныс күштерінің мобильді отрядтары жұмылдырылды.
Алдын ала мәлімет бойынша, таңғы 09:00-де 33 дрон атып түсірілген немесе басып-жаншылған, олар солтүстік, шығыс және орталық аймақтарда жойылған.
Дегенмен 21 дронның нысанаға тигені тіркелді (сегіз жерде).
Еске сала кетсек, бұған дейін, 14 қыркүйекте, Украина Қарулы күштерінің Бас штабы Қырымда Ресей Қара теңіз флотының байланыс торабына соққы берілгенін хабарлаған.
«11 қыркүйекке қараған түні Әскери-теңіз күштері Қырымның уақытша оккупацияланған аумағындағы «Севастополь» 184-ғылыми-зерттеу сынақ базасында орналасқан РФ Қара теңіз флотының байланыс торабын жойды», – деп хабарлады Бас штаб.
Фото: picturealliance/A. Pavlishak/TASS/dpa
