Зеленский БҰҰ бас хатшысымен не талқылады?

Украина президенті Владимир Зеленский БҰҰ бас хатшысы Антониу Гутерриш шақырған екі күндік «Болашақ саммитіне» қатысты.

Зеленскийдің айтуынша, Ресей осы саммиттің өтуіне  қарсылық білдірген. Сол үшін ол «Болашақ пактісін» қабылдауға үлес қосқан елдерге алғыс білдірді.

Украина президенті Киевтің соғысты тоқтатуға үлкен күш салып жатқанын айтып, бейбітшілік формуласына, халықаралық бейбітшілік саммитіне және биыл өтуі мүмкін екінші бейбітшілік саммитіне дайындық туралы сөз қозғады.

Бұған дейін БҰҰ Бас ассамблеясы жаһандық міндеттерді шешуге әлем елдерінің күш-жігерін біріктіру жоспарын мақұлдады. Онда климат өзгергені, жасанды интеллект, қақтығыстар күшейіп, теңсіздік пен кедейлік өсіп жатқаны туралы айтылған.

«Болашақ пактісі» 22 қыркүйекте екі күндік «Болашақ саммиті» ашылған кезде қабылданды. Сондай-ақ жаһандық цифрлық шарт және болашақ ұрпақ туралы декларация мақұлданды. Бұл шарт цифрлық технологияларды қолдануға қатысты, ал декларация келешек ұрпақты қолдан жасалған апаттардан құтқару үшін қолдан келгенді істеуге шақырады.

Владимир Зеленский сапар аясында әлем елдері басшыларымен, соның ішінде Германия канцлері Олаф Шольцпен кездеспек. Ақ үйде АҚШ президенті Джо Байденмен кездесу өткізеді. Сонымен қатар АҚШ президенттігіне үміткерлер  – Камала Харриспен және Дональд Трамппен де жүздесуді жоспарлап отыр.

Фото: Reuters