Оқушылар күзгі каникулда қанша күн демалады?
Оқу-ағарту министрлігі 2025-2026 оқу жылы қашан басталатын, аяқталатын және каникул кезеңдерін айтты, - деп хабарлайды Malim.kz.
Оқу 2025 жылғы 2 қыркүйекте басталып, 2026 жылғы 25 мамырда аяқталады. Білім күніне арналған салтанатты жиынның уақыты мен күні мектептің педагогикалық кеңесінің шешімімен белгіленеді.
Бірінші тоқсанда оқу уақыты - 8 апта. Күзгі каникул 2025 жылғы 27 қазанда басталып, 2 қарашаны қоса алғанда 7 күнге созылады.
Екінші тоқсан 8 оқу аптасынан тұрады. Қысқы каникул 2025 жылғы 29 желтоқсанда басталып, 2026 жылғы 7 қаңтарды қоса алғанда 10 күнге жалғасады.
Бірінші сынып оқушылары үшін қосымша демалыс 2026 жылғы 9 ақпаннан басталып, 15 ақпанды қоса алғанда 7 күнге созылады.
Үшінші тоқсан 10 оқу аптасынан тұрады. Көктемгі каникул 2026 жылғы 19 наурызда басталып, 29 наурызды қоса алғанда 11 күнге созылады.
Төртінші тоқсанның ұзақтығы - 8 оқу аптасы, оқу жылы 2026 жылғы 25 мамырда аяқталады.
Фото: pexels
