Қазығұрт ауданындағы мектепке оқушылар сыймай, дәлізде оқып жүр. Мұнда балалар 4 ауысымда білім алады. Бұл туралы Отырар телеарнасы хабарлады.
Мектеп 600 орынға арналған, бірақ қазір мұнда мыңнан астам бала білім алып жатыр. Ал басқа мектеп жоқ. Мәселе 6 жылдан бері шешілмей келе жатқан көрінеді.
Мектептің негізгі бөлігі өткен ғасырда бой көтерген. Ол 2018 жылы жарамсыз деп танылып, оқушылар 1982 жылы салынған ғимаратқа көшіріліпті. Мұнда сынып жетпегендікпен ұстаздар дәлізді қоршап, қолдан кабинет жасақтаған. Кейбір бастауыш сынып оқушылары акт залында оқуға мәжбүр. Қазір барлығы 6-сынып дәліздегі кабинеттерде оқып жатыр екен.
Мектеп басшылығы 6 жыл бойы білім бөліміне жаңа ғимараттың қажеттілігін айтып хат жазып жүр. Бірақ мәселе кейінге қалдырыла берген.
- Білім бөліміне хат жаздық. Жылда хат жазып, оны жаңартып отырамыз. Бұзуға жіберілген ғимаратымызды да біледі. Бәрінен хабардар. Хат бойынша жылда «істеп береміз, қаралып жатыр» деген хабар келеді, — дейді Шарбұлақ жалпы білім беретін мектебінің директоры Жанар Жансейітова.
Білім басқармасының ақпараты бойынша, бірнеше жылдан бері тек сметалық құжаты жасалған ғимаратқа қаражат енді ғана аударыла бастапты.
- 2021 жылы жобалау сметалық құжаты шықты. 1 млрд 600 млн теңге болды. Облыстық құрылыс басқармасы қазіргі бағамен корректировка жасады. 2023-те шешімі шықты. Жаңа мектептің құны 1 млрд 965 млн теңге, ал биылға бөлінген лимит - 10 млн теңге, — дейді аудандық білім бөлімінің бас маманы Әмірхан Мамытбеков.
Сонымен, ауылда 300 орындық мектеп салынбақ, алғашқы қаражаты да бөлінген, бірақ құрылыс жұмыстары әлі қолға алынбаған. Жаңа мектеп келер жылы пайдалануға беріледі деп жоспарланып отыр.
Фото: видеодан скрин
Байланысты жаналықтар
MalimBlocks
