ҰБТ-дан екінші оқушы 140 балл жинады
Астана қаласындағы дарынды қыз балаларға арналған "Білім-инновация" лицей-интернатының 11 "е" сынып оқушысы Рашит Жанайым Жанибекқызы Ұлттық бірыңғай тестілеуден ең жоғары көрсеткіштердің бірі – 140 балл жинап, зор жетістікке қол жеткізді, деп хабарлайды Malim.kz.
Білім басқармасының хабарлауынша, Жанайым ҰБТ-да таңдау пәндері ретінде "Дүниежүзі тарихы" мен "Ағылшын тілін" таңдаған. Бұл таңдау – оның "Халықаралық қатынастар" мамандығына деген қызығушылығы мен болашақ кәсіби бағытының айқын көрсеткіші.
Бұл тамаша нәтиже – табандылық пен үздіксіз ізденістің, терең білім мен жүйелі еңбектің жемісі. Жанайым – білімге құштар, жауапкершілігі жоғары, жан-жақты дамыған оқушы. Оның бұл жеңісі – тек жеке табыс емес, сонымен қатар ұстаздарының кәсіби біліктілігінің, мектеп ұжымының қажырлы еңбегінің және ата-анасының қолдауының көрінісі деп білеміз, - делінген басқарма хабарламасында.
Еске сала кетейік, бұған дейін түркістандық түлек Жәнібек Асқарұлы Абилхан ҰБТ-да 140 балл жинаған болатын.
Фото: Астана қаласының Білім басқармасы
Қазақстандағы жаңа ұлт: орыстілді қазақ пен қазақтың арасы алшақтап бара ма?
Ең көп оқылған
