Шымкент қаласы әкімдігінің хабарлауынша, қала әкімі М.Әйтенов қаладағы Ұлттық бірыңғай тестілеуді ұйымдастыру барысын пысықтаған. Жиында Білім басқармасының басшысы Ж.Тажиева баяндама жасап, биыл 11-сыныпты 9 342 оқушы бітіретінін және ҰБТ тапсырудағы өзгерісті айтып өткен. Бұрын ҰБТ қағаз түрінде, 2 рет ақылы және 1 рет грант алу мүмкіндігі негізінде 10 күн аралығында өтіп, ҰБТ өткізу пункттері әр өңірге арнайы белгіленіп келген еді. Ал, 2021 жылдан бастап ҰБТ тапсыру «Бір компьютер – бір камера» принципі бойынша әрбір тестіленуші үшін дербес компьютерді пайдаланумен электрондық форматқа көшті. Бұл ретте тестіленуші жылына 2 рет ақылы және 2 рет білім беру гранттарын тағайындау конкурсына қатысуға мүмкіндік ала отырып, тегін ҰБТ тапсыра алады. Яғни, биыл түлектер ҰБТ-ны электронды форматта тапсырады.
Ж.Тажиеваның айтуынша, ҰБТ арнайы жабдықталған 2 аймақтық «U-Study» тестілеу орталықтарында І-кезеңі 10 наурыз – 10 сәуір аралығында (ЖОО ақылы негізде түсуге) өткізіліп, 6 973 (74,6%) талапкер тест тапсырды.
ІІ-кезеңі 25 сәуір мен 30 маусым аралығында (білім беру гранттарын тағайындау конкурсы арқылы 2 мүмкіндік) өтетін болады. Тестіленушілер өз бетінше (тіркелу сайты - https://app.testcenter.kz/auth) осы жылдың 15 сәуірінен бастап тіркелуде және ҰБТ тапсыру орнын Қазақстанның кез-келген өңірінен таңдау мүмкіндігі бар.
«Бұл жылы 15 173 талапкер тестілеуге (2 рет тапсырғанда 30 346) келеді деп күтілуде. Оның ішінде: Шымкент қаласынан – 8 585 түлек ҰБТ тапсыруға өтініш білдірсе, Түркістан облысының Сайрам, Төлеби, Қазығұрт, Түлкібас, Бәйдібек аудандарынан 6 588 талапкердің келуі жоспарлануда. Жалпы бір күнде екі ауысыммен 43 күн аралығында 30 346 талапкер тестілеуден өтетін болады»,- деді Ж.Тажиева.
Шаһар басшысы атқарылған жұмыстарды тыңдап, тест тапсыру орталықтарындағы қауіпсіздік, санитарлық жағдайдың қатаң қадағалануын тапсырма берген.
Байланысты жаналықтар
MalimBlocks
