Әлеуметтік желіде белгілі сатирик бірнеше кітаптың авторы Көпен Әмірбектің қайтыс болғаны жазылып жатыр. Биыл көктемде 73 жасқа толатын сатириктің нақты неден көз жұмғаны жайлы дерек жоқ.
Көпен Әмірбек - 1950 жылы 29 наурызда Түркістан облысы, Отырар ауданы Ешкіқора ауылында туған.
1974 жылы ҚазМУ-ды бітірген, Владивосток қаласында екі жыл әскери-партия мектебінде оқыған.
"Қазақ әдебиеті", "Егемен Қазақстан" газеттерінде, "Білім және Еңбек, "Ара-Шмель" журналдарында, Республиканың Бас прокуратурасы мен Жоғарғы Сотта баспасөз хатшысы болып қызмет істеген. Тәуелсіздік жылдары "Ара" журналының бас редакторы, Қазақ радиосы директорының орынбасары болған. Қазақстан Жазушылар одағының сатира кеңесінің төрағасы.
"Аты жоқ кітап", "Алып", "Тілім қышып барады", "Қысыр әңгіме", "Ауызбастырық", "Мың бір мысал", "Неменеңе жетісіп күлесің?", "Өзіңді танисың ба?", "Сайдағы қойшыдан сарайдағы патшаға дейін" атты әзіл-сықақ кітаптары жарық көрген.
Көпен Әмірбек қазақ тілді оқырманға кеңінен танылған. "Тамаша" әзіл-сықақ театрының тұрақты авторларының бірі болған, өзі де түрлі монологтармен сахнаға, экранға жиі шығып тұрған.
