«Уақыты келді емес пе?»: Жұлдыз Әбдікәрімова қазақ тіліндегі кітаптар жайлы мәселе қозғады
Актриса кітап дүкеніне барып қиындыққа тап болғанын айтады
Қазақстандық театр және кино актрисасы Жұлдыз Әбдікәрімова Instagram-да жазба жариялап, қазақ әдебиеті мен кинематографы жайлы ойын бөлісті, деп хабарлайды Malim.kz.
Төрт баланың анасы жақында кітап дүкеніне барғанын айтты. Ол балаларымен бірге қазақ тілінде роман, проза және қиял-ғажайып жанрында жазылған кітаптар сатып алуға келіскен, алайда қиындыққа тап болыпты.
Балалармен кітап дүкеніне бардым…
Келісім бойынша қазақ тілді роман, проза, фантастика алмақ болғанбыз. Бірақ мынандай мәселеге тап болдық.
Қазақ тілді шығарманың басым бөлігі дала, жайлау, көшпенді ел, барымта, соғыс жайлы екен.
Қалада туып-өскен бала галактика, жасанды интеллект, матрица әлемі туралы оқығысы келеді.
Мені ойландырғаны, аграрлы өмірден урбанизацияға кеткелі қанша уақыт өтті?! Қалада туған бала жайлауды, жылқының ат-әбзелдерін біле бермейді. Бірақ ол үшін оны айыптай аламыз ба?
Байқағаным, бізге қалалық әдебиет, детектив, фентези жанрлары жетпейді екен. Мысалы, Алдаркөсені дәл сол қалпында адам алдайтын кейіпте емес, ақылды, өте парасатты, Шерлок Холмстың деңгейіне неге көтере алмаймыз? Әдебиетіміз әлеммен санасатын кез келмеді ме?
Неге әдеби кейіпкерлер әлі күнге кино мен мультипликация кейіпкерлеріне айнала алмай отыр? Неге әлі ат мініп, жайлауда шапқылап жүр? Біздің кейіпкерлер жаңа уақытпен санасатын, тыныстайтын уақыт келді емес пе? - деп жазба қалдырды ол.
Өнер иесі сөз соңында оқырмандарынан қазақ тілінде жазылған фентези жанрындағы туындыларды бөлісуді сұраған.
Фото: интернеттен
Байланысты жаналықтар
MalimBlocks
