Ұлттық музейде Суретшілер одағының мерейтойлық көрмесі ашылды

Ұлттық музейде Қазақстан Суретшілер одағының 90 жылдық мерейтойына арналған «1933-2023. Қазақстан Республикасының Суретшілер одағына 90 жыл!» атты Халықаралық көрменің ашылуы мен дөңгелек үстел өтті.  Ауқымды шара Мәдениет және ақпарат министрлігінің қолдауымен өткізілуде.   

ҚР Мәдениет және ақпарат вице-министрі Данияр Қадіров жылы лебізін білдіріп, министр Аида Балаеваның құттықтауын жеткізді. «Қазақстан Суретшілер одағы суретшілерімізді ел ішінде және шетелде насихаттап жүрген шығармашылық ұйымдардың бірі де бірегейі. Осы мүмкіндікті пайдалана отырып қылқалам шеберлеріне шығармашылық жетістік, мол табыс, шабыт тілеймін», - делінген құттықтау сөзде.

Қазақстан Суретшілер одағының төрағасы, Қазақстан Республикасының еңбек сіңірген қайраткері Өмірбек Жұбаниязов: «Бұл жыл – біз үшін ерекше жыл. Одақтың 90 жылдық мерейтойына куә болып жатқанымызға қуанышымыз шексіз. Бұл көрменің басты ерекшелігі – 10 мемлекет қатысып, бізге қолдау көрсетіп отырғаны. Осы шетелдік суретшілердің шығармалары ҚР Ұлттық музейі мен Ә. Қастеев атындағы өнер мұражайының қорларына тапсырылады. Барлық әріптестерге, Мәдениет және ақпарат министрлігіне, Ұлттық музей ұжымына, Астана Суретшілер одағына алғысымды білдіремін», - деді.

Көрмеге 226 отандық және шетелдік суретшінің 270-тен астам кескіндеме және графикалық жұмыстар, мүсіндер, гобелендер, керамика, киізден жасалған бұйымдар, кесте тігу сияқты жұмыстары қойылған.

Әрбір картина халықтың өмірі мен тұрмысы, тәуелсіздік алғанға дейін болған оқиғалар, қазақ халқының мәдениетін дамытуға үлес қосқан не Ұлы дала тұрғындарының сан ғасырлық арманына қол жеткізуде елеулі рөл атқарған тұлғалар туралы баяндайды. Қоршаған ортаның үйлесімділігі, мифтер мен ежелгі құпиялар, қазіргі қала мен дала өмірінің тынысы, оның атмосферасы тақырыптық бағыттағы жұмыстарда көрініс тауып, осы уақытқа дейін жалғасып келеді.