Елімізде жанармай мен дизель бағасын мемлекеттік реттеуді алып тастамақ

Энергетика министрлігі мұнай өнімдерін бөлшек саудада өткізуге белгіленген шекті бағаларды бекіту туралы бұрын қолданыста болған бұйрықтардың күшін жоймақ. Бұйрық жобасы «Ашық НҚА» порталында жарияланды, деп хабарлайды Malim.kz.

Министрлік мәлімдеуінше, бүгінде Қазақстанда бензин мен дизель отынының бағасы әлемдегі ең төмен бағалардың бірі. Бұл жағдай, әсіресе көрші елдермен айтарлықтай баға алшақтығына әкеледі.

Мысалы, Қазақстанда АИ-92 бензинінің бағасы литріне 205 теңге, Ресейде 288 теңге, Қырғызстанда 385 теңге, Өзбекстанда 489 теңге. Дизель отыны Қазақстанда литріне 295 теңге, Ресейде 355 теңге, Қырғызстанда 427 теңге, Өзбекстанда 528 теңге тұрады.

Мұндағы АИ-92 бензинінің бағасындағы айырмашылық 40%-дан 138%-ға дейін, дизель отынына 20%-дан 79%-ға дейін жетеді. Бұл тапшылықты, саланы жаңғыртудың мүмкін еместігін, отынды әр түрлі заңсыз схемалар арқылы шетелге әкетуге жол ашады, деп жазылған министрлік мәлімдемесінде.

Осыған байланысты Энергетика министрлігі баға белгілеудің тұрақты моделі саясатына көшіп жатыр. Ол сұраныс пен ұсыныс арасындағы нарықтық теңгерімді құруға, отын тапшылығын жоюға, мұнай өңдеу саласын жаңғыртуды ынталандыруға, жаңа жұмыс орындарын құруға және ұзақ мерзімді инвестицияларды тартуға бағытталған.

Фото: видеодан скриншот