Қайталанатын IMEI-кодтардан ел қазынасына жылда 150 млрд теңге түспейді
Елімізде ұялы телефондардың «ақ», «сұр» және «қара» тізімдері жасалады
Бұл тізімдер елге әкелініп жатқан телефон құрылғыларының жеке IMEI-кодтарында кілтипан бар-жоғына қарай жасалмақ, деп хабарлайды Malim.kz.
Цифрлық даму, инновациялар және аэроғарыш өнеркәсібі министрі бұйрығының жобасы «Ашық НҚА» порталында жарияланған.
Құжатқа сәйкес, желіге тіркелген кезде қайталанатын немесе өзгертілген IMEI кодтары бар телефондар және жаһандық ұялы байланыс жүйесі қауымдастығының (GSMA) ұқсас тізімінде тұрған құрылғылар қара тізімге енгізіледі.
Қазір елге ұялы телефондарды, оның ішінде қайталанатын IMEI-кодтарын әкелудің заңсыз схемалары бар. «Сұр» импорттың бір схемасы елге жалған ұялы телефондарды әкелу. Ұялы байланыстың абоненттік құрылғыларының сәйкестендіру кодтарының дерекқоры мәліметтеріне сәйкес, қазір еліміздің ұялы байланыс компанияларының желілерінде IMEI-кодтары қайталанатын 3,7 миллионға жуық абоненттік құрылғы жұмыс істейді, делінген құжатта.
Министрлік мәліметінше, соның кесірінен мемлекет қазынасы тікелей түрлі алым-салық түрінде жылына 100 млрд теңгеден асатын қаражаттан қағылып отыр. Ал осы қызметке ілеспе басқа да салықтарды (ҚҚС, КТС, СН және т.б.) төлемеуді ескерсе, бюджет шығындары 150 млрд теңгегег жетеді.
Сонымен қатар, қайталанатын IMEI-кодтардың болуы құқық қорғау органдарына ұрланған ұялы телефондарды іздеу және оларды бұғаттау бойынша жедел жұмысты тиімді жүргізуге мүмкіндік бермейді.
Ал жаңа механизм арқылы елге заңсыз әкелінген құрылғыларды бұғаттауға болады. Сондай-ақ, мемлекеттің кедендік және салықтық төлемдерден түсетін кірісін ұлғайтуға мүмкіндік бермек.
Құжат 2 қыркүйекке дейін жария талқылауда болады.
Фото: pixabay.com
