Қазақстанға келетін шетелдік туристердің 62%-ы – ШЫҰ елдерінің азаматтары
Елімізде 114 әуе бағыты бойынша тұрақты рейс ұйымдастырылған
Алматыда Шанхай Ынтымақтастық Ұйымына мүше мемлекеттердің туризм әкімшіліктері басшыларының кездесуі өтті. Алқалы жиында туризм саласындағы әріптестікті одан әрі дамытудың маңызды мәселелері қаралды, деп хабарлайды Malim.kz.
Статистикалық мәліметтер бойынша, Қазақстанға келетін шетелдік туристердің 62%-ы ШЫҰ елдерінің азаматтарына тиесілі. Қазақстан ұйымға мүше елдің барлығымен визасыз режим орнатқанын айта кеткен жөн.
Туризм және спорт министрлігінің мәліметінше, бүгінде Қазақстанда 114 әуе бағыты бойынша 28 елмен аптасына 560 тұрақты рейс ұйымдастырылған. Оның ішінде 245 рейс ұйым мүшелері арасында жүйелі түрде орындалады. Осы көрсеткішті жақсарту бойынша жұмыстар жүріп жатыр. Сонымен қатар «әуе еркіндігінің» 5 дәрежесінің арқасында IndiGo, FlyNas, AirAsia X сияқты шетелдік әуе компанияларының ұшақтары жиілігі мен түрлері бойынша Қазақстанның бірқатар әуежайына шектеусіз ұшуды орындау құқығына ие болған.
Фото: Астана халықаралық әуежайы
