Германия тұрғындары жанармай бағасының қымбаттауына байланысты жеке көлікті аз пайдаланып, велосипед пен қоғамдық көлікке жиі көшіп жатыр, деп хабарлайды Malim.kz Deutsche Welle басылымына сілтеме жасап хабарлады.
Verivox порталының тапсырысымен жүргізілген сауалнамаға сәйкес, респонденттердің 48 пайызы АҚШ пен Израильдің Иранға қарсы соғысы салдарынан жанармай бағасы өскеннен кейін жеке автокөлікті сирек қолдана бастағанын айтқан.
Сауалнама нәтижесі бойынша:
29 пайыз неміс көліктің орнына велосипедпен қатынай бастаған;
24 пайызы қоғамдық көлікті жиі пайдаланатынын мәлімдеген.
Жалпыгерманиялық автомобиль клубының мәліметінше, 7 мамыр күні Германияда бензин мен дизель бағасы наурыз айының басынан бергі ең төменгі деңгейге түсті. Бұған әлемдік нарықтағы мұнай бағасының арзандауы және Германия үкіметі енгізген «жанармай жеңілдігі» себеп болған.
Мысалы:
E10 бензинінің орташа бағасы литріне 1,984 еуро;
дизель отынының бағасы 2,025 еуро болған.
Сонымен қатар, сауалнамаға қатысқандардың 67 пайызы энергияны үнемдеуге көбірек көңіл бөле бастағанын айтқан.
Ең көп қолданылатын үнемдеу тәсілдері:
56 пайызы пайдаланылмай тұрған электр құрылғыларын толық өшіреді;
55 пайызы үйдегі жылыту қуатын азайтқан;
52 пайызы электр энергиясын саналы түрде үнемдейді;
47 пайызы ыстық суды аз қолданады.
Сарапшылардың пікірінше, энергия бағасының өсуі Германия тұрғындарының күнделікті әдеттеріне айтарлықтай әсер етіп жатыр.
