Иран АҚШ-пен екі ай бұрын орнатылған бітімнен кейін алғаш рет мұнай экспортын қайта бастады. Теңіз арқылы жеткізілімдер Вашингтон мен Тегеран арасындағы соғысты тоқтату туралы келісім жасалғаннан кейін жанданды, деп хабарлайды Malim.kz, DW агенттігіне сілтеме жасап.
Мұнай тасымалы мен сақталуын геолокация деректері және спутниктік суреттер арқылы бақылайтын TankerTrackers сайтының мәліметінше, Diona және Hero2 атты екі ирандық супертанкер АҚШ әскери-теңіз күштері орнатқан теңіз қоршауынан шыққан.
Олардың бортында жалпы көлемі 3,8 миллион баррель (604 миллион литр) иран мұнайы болған. Кейін сайт тағы бір ирандық танкердің бір миллион баррель мұнай тиеп өткенін тіркеді.
АҚШ пен Иран 14 маусымда соғысты тоқтату туралы келісімге келген. Қақтығыс ақпан айының соңында АҚШ пен Израильдің Иранға жасаған әуе шабуылдарынан басталған еді. Келісім өңір аумағында атысты дереу тоқтатуды да қарастырады.
Алдағы 60 күн ішінде Тегеран мен Вашингтон түпкілікті бейбіт келісім әзірлеуі тиіс. Иран Сыртқы істер министрлігінің мәліметінше, соғыс басталған кезде АҚШ енгізген ирандық порттарға қатысты қоршау 16 маусымда-ақ алынып тасталған.
Алайда Ормуз бұғазының тағдыры әлі де тараптар арасындағы келіспеушілік мәселесі болып отыр. Тараптар оның ашылу мерзімі мен шарттарына қатысты әртүрлі мәлімдеме жасауда. АҚШ президенті Трамп маңызды теңіз жолы қайта ашылып, кемелерден ешқандай төлем алынбайтынын айтты. Ал Тегеран Ормуз бұғазы «30 күн ішінде» ашылатынын мәлімдеп, кемелердің өтуі үшін ақы алуды жоспарлап отырғанын жеткізді.
