Каспий теңізінен бұған дейін із-түзсіз жоғалған екі әскери қызметшінің денесі табылды. Іздестіру-құтқару жұмыстары аяқталды, деп хабарлайды Malim.kz.
ҚР Қорғаныс министрлігінің мәліметінше, 25 қыркүйек күні шамамен сағат 09:15-те іздестіру-құтқару жұмыстары барысында сержант Мансур Гумаров пен матрос Мирас Тұрдыбекұлының денесі табылған.
Қорғаныс министрлігі қаза тапқан әскери қызметшілердің туған-туыстары мен жақындарына көңіл айтты. Ведомство марқұмдардың отбасыларына қажетті материалдық және психологиялық көмек көрсетілетінін мәлімдеді.
Еске салайық, қайғылы жағдай оқу-жауынгерлік тапсырманы орындау кезінде болған. Қорғаныс министрлігінің мәліметінше, ауа райының кенеттен күрт нашарлауынан 17 әскери қызметшіні теңіз ағысы ашық айдынға алып кеткен. Олардың үшеуі құтқарылып, 14 әскери қызметші қаза тапты.
