Интернет алаяқтық: қарағандылық күдіктілерден 232 sim-карта мен 2 sim-box тәркіленген

Қарағанды облысында полиция қызметкерлері ІІМ-нің киберқылмысқа қарсы іс-қимыл департаментімен, ҰҚК-мен және ұялы байланыс операторларымен бірлесе отырып, интернет-алаяқтыққа байланысты заңсыз әрекеттерді тоқтатуға бағытталған операция жүргізді, деп хабарлайды Malim.kz.

Жедел-іздестіру іс-шараларының нәтижесінде Теміртау қаласының 34 және 36 жастағы екі тұрғыны ұсталды. Күдіктілер ұялы байланыс құрылғыларының сәйкестендіру кодтарын заңсыз өзгертіп, сондай-ақ, осы мақсатта бағдарламалық қамтамасыз етуді жасап, қолданды және таратты деп айыпталып отыр.

Тергеу барысында қаскүнемдердің бір бөлмелі пәтерді жалға алып, онда арнайы жабдық орналастырғаны анықталды. Олар әр 10 күн сайын пәтерге келіп, пайдаланылатын құрылғылардағы sim-карталарды ауыстырып отырған. Тінту барысында полиция қызметкерлері 232 sim-карта мен 2 жиынтық sim-box жабдығын тәркіледі. Бұл құралдар алаяқтық әрекеттерді жүзеге асыру үшін қолданылған, деп жазылған полиция мәлімдемесінде.

Аталған дерек бойынша қылмыстық іс қозғалған. Құқыққа қайшы әрекеттердің барлық мән-жайын және ықтимал сыбайластарды анықтауға бағытталған тергеу жүріп жатыр.

Сонымен қатар киберполиция қызметкерлері Қарағанды қаласының 30 жастағы тұрғынын ұстаған. Ол әлеуметтік жәрдемақы алуға және жүргізуші куәлігін дайындауға көмектесу сылтауымен азаматтарды алдап, олардың атына онлайн-несиелер рәсімдеген. Оның 11 эпизодқа қатысы бар екені дәлелденді. Фигуранттың осындай басқа да қылмыстарға қатысы бар-жоғы тексеріліп жатыр.

Фото: polisia.kz