«Қамқорлығы» үшін 3 млн алған. Шымкентте қылмыстық топтың бірнеше мүшесі ұсталды
Келіспеген жағдайда физикалық және моральдық қысым жасаған
Бұл туралы Polisia.kz сайты хабарлады. 8 қазанда ұйымдасқан қылмысқа қарсы күрес басқармасы жедел іс-шаралардың нәтижесінде ойын-сауық мекемелеріне қылмыстық қамқоршылық көрсеткен жастар тобы қолға түсті.
«Олардың бопсалауға, бұзақылыққа және қаруды заңсыз сақтауға қатысы болғаны туралы мәліметтер алынды. 11 қазанда Шымкент кәсіпкерлерін бопсалауға қатысы бар басқа қылмыстық топтың мүшелері ұсталды. Олар өздерінің қылмыстық қамқорлығы үшін үш миллион теңгеге дейін алған. Келіспеген жағдайда физикалық және моральдық қысым жасаған», - делінген хабарламада.
Осы деректер бойынша ішкі істер органдарына барлығы 35 фигурант жеткізілген, 100-ден астам тінту шаралары жүргізілді. Қару-жарақ пен оқ-дәрі тәркіленді.
«Айта кету керек, жыл басынан бері Шымкент қаласында қылмыстық топтардың жолын кесу барысында 30-дан астам атыс және травматикалық қару, оның ішінде бір Калашников автоматы, 15 шолақ мылтық, 11 тапанша, екі винчестер және мыңнан астам оқ-дәрі тәркіленді. Өңірлерде "заң және тәртіп" қағидатын қамтамасыз ету бойынша жұмыс ерекше бақылауда», – деді ІІМ ұйымдасқан қылмысқа қарсы департаментінің өкілі Қуандық Алпыс.
Фото: ІІМ
