Azerbaijan Airlines әуе компаниясына тиесілі Embraer E190AR ұшағында жұмыс істеген бортсерік Зұлфұқар Асадов Грозный әуежайына қону әрекеттері кезінде ұшаққа сырттан соққы жасалып, жарақат алғанын айтты, деп хабарлайды Malim.kz.
Оның айтуынша, үшінші қону әрекетінен кейін «ұшақтың сыртынан біртүрлі дыбыс естілген», ал салонда үрей басталған. Асадов тағы бір сыртқы соққы кезінде қолын жарақаттап, әріптесінің көмегімен жарасын таңып алған.
Бортсеріктің айтуынша, пилот соққы салдарынан қозғалтқыш зақымданғандықтан, ұшақты суға емес, құрлыққа қондыруға шешім қабылдаған: суға қону үлкен жылдамдыққа байланысты ұшақтың бөлшектенуіне әкелуі мүмкін еді. Асадов борттағы оттегі баллонының жарылуы туралы нұсқаны мүлдем жоққа шығарады — ол мұндай нәрсе мүмкін емес екеніне сенімді.
Сондай-ақ Azerbaijan Airlines компаниясы апатқа ұшыраған “ұшақ сыртқы физикалық және техникалық әсерге тап болды” деп мәлімдеді. Компания бұдан артық толық мәлімет бермеді.
Фото: 1news.az
