Астанада жолаушылар автобусы жаяу жүргіншілерге арналған өткелден өтіп бара жатқан оқушы қызды қағып кетті, деп хабарлайды Malim.kz.
Оқиға жол қозғалысы ережелеріне сай белгіленген өткелде болған. Алайда Telegram-дағы Kris_p_astana арнасының мәліметінше, жүргізуші белгісіз себептермен тежегішті уақытында басып үлгермеген.
Жол-көлік оқиғасы салдарынан қыз бала әртүрлі дене жарақатын алып, шұғыл түрде балалар ауруханасына жеткізілді. Қазіргі уақытта дәрігерлер оған қажетті медициналық көмек көрсетуде.
Сондай-ақ, автобустың салонында болған бір жолаушы да апатты тежеу кезінде жарақат алып, медициналық мекемеге жеткізілген.
Астана қалалық полиция департаменті оқиға бойынша тексеріс жүргізіліп жатқанын хабарлады. Құзырлы орган барлық жол қозғалысына қатысушыларды жол қауіпсіздігі ережелерін сақтауға және аса мұқият болуға шақырады.
Фото: pixabay.com
