Маңғыстау облысында қара қоңыз қаптады
Қоңыздар аудан орталығы Бейнеуде және Ақжігіт, Боранқұл, Сарға ауылдарында қаптап кеткен. Жәндіктер ауыл тұрғындарының мазасын қашырып отыр. Бұл туралы kazinform.kz агенттігі жазды деп хабарлайды Malim.kz.
Бейнеу ауылының тұрғыны Бақыт Тілеумұратова 4-5 күннен бері түнде ұйықтамағанын айтады.
Кеш болса болды, үйдің маңайы қара қоңызға толып кетеді. Одан ол өрмелеп үйге кіреді. Немерелерімнің құлағына кіріп кетер деп, оларды Ақтауға жібердім. Өзіміз де құлағымызға мақта тығып жатамыз. Өлтірген сайын көбейіп жатыр. Кеше жаңбыр жауып еді, содан кейін пайда болды осы қоңыздар. Түнде ұйқы жоқ, - дейді Бақыт Тілеумұратова.
Қара қоңыздар көшелерді, саябақтарды түгел жайлаған. Ауылдарда су жиналған құдықтарға дейін түсіп, суды ластаған. Тұрғындар жәндіктермен қалай күресерін білмей дал.
Үйдің төбесі шытырлап, түнімен жатқызбайды. Өзі ұшады, қанаты бар. Адамды шағады. Қалай құтыларымызды білмей отырмыз. Көршілердің бәрі сонымен арпалысып жатыр. Улайын деп препарат іздеп шықтым, - дейді Кенжеғұл Әбілшеев.
Ал Бейнеу аудандық фитосанитария бөлімінің басшысы Дастан Мұхановтың айтуынша, қара қоңыздың қаптауы алғаш рет тіркеліп тұр.
Бұл - табиғи құбылыс. Біз қоңыздарды зертханаға жіберіп жатырмыз. Карантиндік па, карантиндік емес па, зертхана қорытындысынан кейін жариялаймыз. Бірақ тұрғындарға жәндіктерді өздігінен улауға кеңес бермеймін. Дезинфекция мамандарына жүгінген дұрыс, - дейді бөлім басшысы.
Фото: pixabay.com
Ең көп оқылған
