Маңғыстауда жантүршігерлік жол апатында 10 адам қаза тапты
Маңғыстау облысының Қарақия ауданындағы Сенек ауылынан 90 шақырым жерде ауыр жол-көлік оқиғасы орын алды, деп хабарлайды Malim.kz
Алдын ала мәлімет бойынша, 11 қыркүйекте Toyota Hiace жүргізушісі көлікті басқара алмай, жол жиегіне аударылып кеткен. Салонда жолаушылар болған. Оқиға салдарынан 8 адам оқиға орнында қаза тауып, тағы екеуі ауруханаға жеткізу кезінде көз жұмды. Жүргізуші мен екі жолаушы түрлі жарақаттармен ауруханаға жатқызылды.
Полиция департаментінің мәліметінше, қылмыстық іс қозғалып, сотқа дейінгі тергеу басталды. Қажетті сараптамалар тағайындалды.
Полиция қаза тапқандардың туыстары мен жақындарына көңіл айтып, жүргізушілерді жол ережелерін қатаң сақтауға шақырды.
«Жолаушыларды тасымалдау кезінде жылдамдық режимін және қауіпсіздік талаптарын орындау аса маңызды. Жол ережесін болмашы бұзудың өзі қайғылы салдарға әкелуі мүмкін», – делінген хабарламада.
Фото: КазТАГ/Мадина Алимханова
