Өскеменде тұрғындарға аю шабуылдады. Әкімдік не дейді?

Кеше Malim.kz ШҚО-ның Серебрянка қаласында адамға аю шабуылдағанын жазған болатын. Аю екінші посттың жол бұрушы қызметкеріне тап берген. Желі қолданушылары теміржолшылар оны өлтіріп, видеоға түсіріп алғаны туралы жазып, бұл әрекетті сынға алған еді.

Осы жағдайға қатысты Алтай ауданының әкімдігі ресми жауап берді. Аудан әкімінің орынбасары Жанна Асқарованың айтуынша, қонжықты пойыз қағып кетуі мүмкін. Ол 23 тамызда «Химик» тұрғын алабының маңынан теміржолдың 89 шақырымынан табылыпты. Теміржол станциясының қызметкерлері өлексені жолдан шығару үшін сол жерге келген.   

Дегенмен, бұл жақта аюдан келер қауіп те жоқ емес. Осы маңдағы тұрғындар  аю қонжығын іздеп келуі мүмкін деп үрейленіп отыр. Оның үстіне тамыздың 24-нен 25-не қараған түні Пристанская, 1 мекенжайында орналасқан көмір қоймасының маңынан жыртқышты көргендер бар. Ауладағы ит абалап кеткен соң қойманың күзетшісі тысқа шығып, аюды үркітіп жіберген. Осы түні әлгі түз тағысын ПЧ-38 №2-ші постының жолбұрушысы да теміржолдың бойынан көреді.

Осыдан кейін аю шабуылынан қорыққан тұрғындар Серебрянка қаласының әкімдігінен көмек сұраған. Әкімдік пен полиция қызметкерлері ПЧ-38 №2-ші постының маңында таңға дейін кезекшілік ұйымдастырды. Дауыс зорайтқышы бар көлікпен қала ішін аралап, тұрғындарға қауіпсіздік шаралары жайлы ескертті.

- Табиғи ресурстар және табиғат пайдалануды реттеу басқармасына, облыстық орман шаруашылығы және жануарлар дүниесі аумақтық инспекциясына, «Орман аңшылық шаруашылығына жедел ден қою жасағы» мекемесіне хат жолданып, адамдар мен ауыл шаруашылығы жануарларының өміріне төнген қауіпті жоюға жәрдемдесу туралы өтініш жасалды, - деп хабарлады аудан әкімдігі.

Фото: Видеодан скрин