Павлодарда 2 жасар бала 5-қабаттан құлап, комаға түсті

13 сәуірде Павлодарда 2 жастағы бала 5-қабаттан құлап, ауыр хәлде ауруханаға түсті, деп хабарлайды Malim.kz тілшісі.

Оқиға туралы Павлодар облысы бойынша бала құқықтары жөніндегі уәкіл Сауле Шакенова хабарлады. Бұл ақпаратты облыстық балалар ауруханасының баспасөз қызметі де растады.

"2 жас 11 айлық бала таңғы 08:50-де жедел жәрдеммен жеткізілді. Ол әжесінің үйінде болған. Ауруханаға түскен кезде жағдайы ауыр, 1-дәрежелі комада болды. Бас сүйек-ми жарақат алып, миы шайқалған, миы және іші көгерген, өкпенің контузиясы анықталды. Қазір қосымша тексерулер жүргізіліп жатыр", – делінген аурухана мәліметінде.

Бала құрылыс дүкенінің шатырындағы төбесіне құлап түскен. Оны құтқарушылар арнайы құрал-жабдықтың көмегімен түсіріп, дәрігерлерге тапсырған.

"Құтқару қызметіне қоңырау 08:20-да түсті. Құтқарушылар сатылы құрылғы мен альпинистік құралдарды қолданып, баланы шатырдан түсіріп, жедел жәрдемге берді", – деді Павлодар облысы ТЖД баспасөз қызметі.

Биыл бұл облыста алғаш рет бала терезеден құлап тұр. Балалар омбудсменінің айтуынша, 2024 жылғы 15 сәуірден бастап күшіне енген ҚР ӘҚБтК 127-бабына сәйкес, бала қайда болса да – ата-анасының немесе қамқоршысының қауіпсіздігін қамтамасыз етуі міндетті.

"Қазір әлеуметтік желіде ата-ананы жазалау керек пе, жоқ па деген пікірталас жүріп жатыр. Бірақ екі жасар бала таңғы 8-де терезені өзі аша алмайды. Демек, терезе ашық тұрған", – деді Шакенова.

Балалар ауруханасының ақпаратына сәйкес, былтыр облыста биіктен құлап жарақат алған 51 бала тіркелген. Бұл статистика сырғанақтан, шатырдан, терезеден және терең шұңқырдан құлаған балаларға қатысты. Ал биылдан бастап тек терезеден құлаған балалар туралы жеке есеп жүргізілмек.

Полиция департаменті бұл жайт бойынша тексеру жүргізіп жатқанын хабарлады.

"Ата-аналарға ескерту – жылы күндерде балалардың қауіпсіздігіне барынша мұқият болыңыздар. Баланың қайда жүргенін қадағалап, көзден таса етпеңіздер. Олардың өмірі мен денсаулығы – сіздердің жауапкершіліктеріңізде", – делінген полиция хабарламасында.

Ата-ананың жауапкершілігі қандай?
ҚР Әкімшілік құқықбұзушылық туралы кодексінің 127-бабына сәйкес, кәмелетке толмаған баланың қауіпсіздігін қамтамасыз етпеу 10 АЕК көлемінде айыппұлға немесе бір жыл ішінде қайталанса – 15 АЕК айыппұлға немесе 5 тәулікке дейін қамауға алуға әкелуі мүмкін.

Фото: pixabay.com