Қарағанды облысында ауа райының қолайсыздығына байланысты 800-ден астам көлік республикалық трассада қалып қойды, деп хабарлайды Malim.kz.
Қарағанды полиция департаментінің мәліметінше, облыстағы екі негізгі бағыттағы жолдар – Қарағанды-Астана және Қарағанды-Павлодар трассалары жабылды. Сонымен қатар, республикалық маңызы бар Алматы-Екатеринбург трассасында Теміртау маңында жолдар жабылуына байланысты шамамен 800 көлік кептеліп қалған. Бұл трасса елдің негізгі магистральдерінің бірі болып табылады және күн сайын 10 мыңнан астам көлікке қызмет көрсетеді.
Қазіргі уақытта полиция жолдағы жағдайды тұрақтандыру үшін барлық қажетті шараларды қолға алып жатыр. Жақын арада автоколонналарға ілесіп жүру ұйымдастырылып, көлік жүргізушілері мен жолаушылардың қауіпсіздігі қамтамасыз етіледі.
Полиция тұрғындарды елді мекендерден тыс жерлерге сапар шегуден бас тартуға шақырады. Жол жағдайы туралы өзекті ақпарат алу үшін 112 қызметінің хабарламаларын мұқият қадағалау ұсынылады.
Фото: видеодан кадр
