Дзюдодан 60 келіде Токио олимпиадасында қола медаль алған Елдос Сметов орталық коммуникациялар қызметі алаңында өткен онлайн брифингіде жүлдеге қол жеткізгеннен кейінгі қуанышы мен ақтық айқасқа жолдама үшін жапон балуанымен болған күрес туралы ой-пікірімен бөлісті.
"Бірінші олимпиадада (2016 жылы өткен Рио олимпиадасында Елдос Сметов күміс медаль алған - ред.) бұйырмай қалған алтын деп ат қойып едік, сол алтынға еңбек етіп, алтын үшін күрестік. Мақсатымыз алтын болды. Қолымнан келгеннің бәрін жасадым. Бапкерлермен, командамен алтынға жол салдық. Бірақ бұйырған нәрсе қола медаль болды. Оған да Аллаға шүкір. Қуанышты сезімдемін. Өйткені жүлдесіз қалып қойғаннан гөрі жүлдемен еліміздің абыройын көтерген мен үшін үлкен мәртебе", - деді Елдос Сметов.
Спортшы жартылай финалда екі дүркін әлем чемпионы, жапондық балуан Такатодан жеңіліп, финалға шыға алмады. Елдос Сметов онлайн брифингіде бұл белдесуде барын салғанын жеткізді.
"Ақтық айқасқа жолдама үшін күрескен жапон балуанымен баяғыдан бері кездесіп, күресіп жүрміз. Көптеген жарыста бақ сынастық, екеуміз бір- біріміздің қыр-сырымызды білеміз деп айта аламын. Ол да өзінің жүз пайыз дайындығын көрсетті, мен де жүз пайыз дайындығымды көрсеттім. Бірақ бұйырмады. "Бақ шаба ма, бап шаба ма" деген сөз бар. "Былай күрескенде басқаша болар ма еді", әлде "мына нәрсені істеуім керек еді", бір қателік жібердім деп ойламаймын. Барымды салдым. Тек бұйрық болмады", - деді Сметов.
Сметов келесі Олимпиада ойындарына қатысу-қатыспау туралы шешімді әзірге қабылдамағанын, оны алдағы уақыт көрсететінін айтты.
