Қаржы нарығын реттеу және дамыту агенттігі (ҚНРДА) «Фридом Финанс» компаниясына қатысты топ-менеджердің алаяқтық әрекеттері туралы шағымдарға байланысты тексеріс жүргізуде, деп хабарлайды Malim.kz.
Агенттікке төрт жеке тұлғадан олардың құқықтарының бұзылғаны туралы шағымдар түскен.
Тексеріс Қазақстан Республикасының «Қаржы нарығы мен қаржы ұйымдарын мемлекеттік реттеу, бақылау және қадағалау туралы» заңына сәйкес жүргізілуде.
Егер заңбұзушылықтар анықталса, агенттік тиісті шаралар қабылдайды.
2024 жылдың тамызында «Фридом Финанс» компаниясында ішкі қызметтік тексеру жүргізілген.
Анықталған деректер бойынша, атқарушы директор В.В. Световой клиенттердің сенімін пайдаланып, ақшаларын компания шотына емес, өзіне аударуды сұраған.
Бұл қаражат инвестицияға жұмсалмай, жеке қажеттіліктері мен қарыздарын өтеуге пайдаланылған.
Световойдың бұл әрекеттері компания басшылығының келісімінсіз жасалған.
2024 жылдың тамызында ол жұмыстан босатылған, ал тергеу материалдары құқық қорғау органдарына берілген.
Ал КазТАГ агенттігінің ақпаратынша, 17 наурызда «Фридом Финанс» компаниясынан түсініктеме сұрағанымен, әлі жауап алынбады.
Айта кетейік, «Фридом Финанс» Freedom Holding Corp. құрамына кіреді. Бұл холдингтің негізгі акционері – ресейлік тегі бар кәсіпкер Тимур Турлов.
Фото: bankffin.kz
