Кәрім Мәсімовтің тәркіленген қымбат бұйымдары миллиондаған теңгеге сатылды
Ұлттық қауіпсіздік комитетінің бұрынғы төрағасы, сотталған Кәрім Мәсімовтің үйінен алынған сән-салтанатты заттар аукционда сатылды, деп хабарлайды Malim.kz.
7 қазанда өткен саудада Қайтарылған активтерді басқару компаниясы (ҚУВА) он түрлі бағалы бұйымды сату үшін ұсынған. Олардың қатарында жазу қаламдары, қылыштар, қанжарлар, коллекциялық монеталар және ұлттық өрнегі бар белдік болған.
Құжаттарда бұл заттардың барлығы Мәсімовке тиесілі сарайдың сипаттамасына сәйкес келетін үйден тәркіленген мүлік ретінде көрсетілген.
Сатылымға қойылған мүліктің жалпы құны — 3,5 миллион теңгеден асады.
Аукцион 7 қазан күні сағат 12:00-де электронды сауда алаңында өтті.
Он лоттың жетеуі сатып алынды.
Сатылғандардың ішінде:
- Montegrappa Italia күміс (925 сынама) қаламы — 440 мың теңгеге сатылды;
- Visconti Firenze қаламы (Құран сүрелерімен безендірілген) — 402 мың теңгеге өтті;
- Қол тұтқасы сүйектен жасалған, тізбегі бар қылыш — 930 мың теңге;
- Сары металдан жасалған өрнекті қылыш — 837 мың теңге;
- Болат қанжар қынымен бірге — 185 мың теңге;
- «Алма отаны», «Астана», «Бәйтерек» және «Қазақстан картасы» атты монеталар жиынтығы — шамамен 199 мың теңгеге сатылды;
- Тағы екі монета — 1000 теңгелік (2003) және 500 теңгелік "Еуразия елдерінің астаналары" (2008) — 82 999 теңгеге өтті.
Алайда мына лоттар сатылмады:
- «Алтын адам» және «Тәуелсіздіктің 20 жылдығы» монеталары (500 теңге, 2011 жыл) — 155 мың теңгеден;
- «Шығыс күнтізбесі» және «Қазақстан фаунасы» сериясындағы монеталар (500 теңге, 2010–2011 жж.) — 107 мың теңгеден;
- Қораптағы былғары белдік — 183 750 теңгеге.
Айта кетсек, бұл ҚУВА компаниясының екінші әрекеті — 16 қыркүйекте өткізілген алғашқы аукционда бұл бұйымдарға сатып алушы табылмаған еді.
Фото: e-auction.e-qazyna.kz
