Мәжіліс депутаты Ерлан Сайыров ауылдық және моноқалалардың тұрғындары үшін жаңа ипотекалық бағдарлама жасау қажетін айтты, - деп хабарлайды Malim.kz тілшісі.
Қазіргі жағдай
Бүгін Мәжіліс отырысында Сайыров депутаттық сауал жолдап, 2024 жылы "Отбасы банк" ауылдық жерлерде алғашқы және екінші деңгейлі тұрғын үй сатып алуға, сондай-ақ жеке тұрғын үй салуға бағытталған "Асыл мекен" пилоттық бағдарламасын іске қосқанын еске салды.
Бұл жобаны жүзеге асыруға банк 2 миллиард теңге бөлген. Бағдарламаға қатысуға "Отау" және "Наурыз" бағдарламалары бойынша кезекте тұрған азаматтарға басымдық берілген. Қарыздың ең жоғарғы сомасы — 10 миллион теңге.
"Алайда бағдарламаның тиімділігіне қарамастан, ол жалғасын таппады — қаржыландыру тоқтатылды. Осылайша Президенттің "Отбасы банк" қызметін аудандар, моноқалалар және ауылдық елді мекендерге бағыттау туралы тапсырмасы нақты іске асырылмады", — деді Сайыров.
Не ұсынылады?
Мәселені шешу үшін депутат "Асыл мекен" бағдарламасының қаржыландыруын арттыруды, оны бүкіл ел бойынша тұрақты жүзеге асыруды, шағын қалаларды қамтуды және республикалық бюджеттен жыл сайын қаражат бөлуді ұсынды.
"Сондай-ақ ауылдық жерлерге бейімделген ипотекалық өнімдерді әзірлеу, ауыл, моноқала және шағын қала тұрғындарына арналған жылдық мөлшерлемесі 5 пайыздан аспайтын, бастапқы жарнасы 10 пайыздан басталатын жеңілдетілген ипотекалық бағдарламалар жасау қажет. Әлеуметтік осал топтар үшін пайыздық мөлшерлемені субсидиялау керек. Сондай-ақ "Бірқабатты Шығыс" (ШҚО) және "Жерұйық" (Жетісу облысы) жобаларының сәтті тәжірибесін пайдалана отырып, әкімдіктермен бірлесіп бағдарламаларды жүзеге асыру қажет", — деп атап өтті Сайыров.
Айта кетейік, бұған дейін Қазақстанда олигархтардан қайтарылған қаражатты ипотекаға бағыттау ұсынылған болатын. Мұндай ұсынысты депутаттық сауалында Мәжіліс депутаты Берік Бейсенғалиев айтқан. Ол елге қайтарылған 50 миллиард теңге заңсыз алынған активтер туралы сөз қозғады.
Фото: pixabay.com
