Бүгін, 10 желтоқсанда сағат 15:30-да Алматы облысы Азат ауылында Шерзат Болаттың ағасы Нұрқанат Ғайыпбаевты ақтық сапарға шығарып салды. Жерлеу рәсімі кезінде отбасындағы екі жақынынан бірдей айырылған Қаржаубай Нұрымов журналистермен кездесуді жөн көрген.
Желіге жарияланған видеода оның тергеуді әділ өткізуді талап еткені байқалады. Тағы бір видеокадрда өзін Нұрымовтың жақынымын деген адам Қаржаубай "өз өзіне қол салмақшы" болды дейді.
Ал Алматы облысы полиция департаменті "Н. есімді азамат прокурордың заңды сақтау туралы түсіндірмесін елемей, өзін агрессивті ұстады, айналасындағы адамдарға қауіп төндіріп, суицид жасаймын деп қорқытты. Полиция қызметкеріне пышақпен шабуыл жасады. Оның мінез-құлқы өзіне де, айналасындағы жандарға да қауіп төндірді. Оның жағдайына алаңдаған туыстары мен адвокаттарының өтініші бойынша полиция Н. есімді азаматты ұстады", – деп мәлімдеді.
Алматы облысы полиция департаментінің ресми өкілі Меруерт Морякованың айтуынша, қазір Қ.Нұрымов полиция бөліміне жеткізілді, онымен психологтар жұмыс істеп жатыр.
Айта кетейік, 9 желтоқсан таңертең Алматы облысының полициясы Талғар қаласы маңынан 30 жастағы ер адамды өлі күйінде тапты. Ол азаматтың биыл күзде Талғардағы жанжал кезінде қаза тапқан Шерзат Полаттың ағасы екені анықталды.
"Алдын ала мәліметтерге сәйкес, ол асылып, өзіне қол жұмсаған" деді полиция. Марқұм Шерзаттың туыстары Нұрғанат Ғайыпбаевтың "суицид жасағанына " сенбей отыр.
Еске сала кетейік, 4 қазан күні Талғар қаласында жанжал болып, 16 жастағы жасөспірім Шерзат Болат пышақтан көз жұмған болатын. Қазір бұл іс бойынша тергеу жүргізіліп жатыр.
Фото: КазТаг
