Шымкентте ардагерлерге «Ұлы Отан соғысындағы Жеңіске 80 жыл» мерекелік медальдары табысталды. Сонымен қатар демеушілер есебінен жаңа көліктер сыйға берілді, деп хабарлайды Malim.kz.
Қалада ардагерлерден тек Нина Мосунова мен Мұраталы Төлепбергенұлы қалған.
Шымкент әкімі Ғабит Сыздықбеков ардагерлерді атаулы күнмен құттықтап, «Ұлы Отан соғысындағы Жеңіске 80 жыл» мерекелік медальдарын табыстады, мемлекет басшысы мен ҚР Қорғаныс министрінің атынан құттықтау хаттарын оқыды. Майдангерлердің құрметіне аулаларда жеке шерулер ұйымдастырылды. Ардагерлерге демеушілер тарапынан жаңа көліктердің кілттері табысталды.
Нина Мосунова 1924 жылы 9 наурызда Ресей Федерациясының Татарстан өңіріндегі Урустамак ауылында дүниеге келген.1942 жылы өз еркімен әскер қатарына алынып, Қазан қаласында телеграфист мамандығын меңгеріп, кейін Горький қаласында осы салада жұмыс істеген.
1943 жылы майдан шебіне аттанып, Можайск маңындағы шайқасқа пулеметші ретінде қатысқан. 36-шы әскери бөлімнің «Зенит» бригадасында қызмет атқарып, радистер бөлімінің командирі болған. Соғыстан кейін Башкириядағы Октябрьск қаласында кассир болып еңбек еткен.
1948 жылы Қазақстанға қоныс аударып, Шымкент қаласында кітапханашы болып жұмыс істеген. Ал 1967 жылы «КазЮгвзрывпром» мекемесінде хатшы-машинист қызметін атқарды. Жауынгерлік ерлігі үшін «Германияны жеңгені үшін» медалімен марапатталған.
Бүгінде ардагер бір баланың анасы, екі немере мен бес шөберенің ардақты әжесі.
Мұраталы Төлепбергенұлы 1925 жылы Жаскешу ауылында дүниеге келген.
Жас сарбаз 1943 жылы небәрі 18 жасында қолына қару алған. Соғыс жолы Брест қамалынан басталып, Варшава, Данск, Виссмарк, Биттенберг және Перлеберг секілді қалаларды азат ету шайқастарымен жалғасады. Жауынгер Жеңісті Германияның Биттенберг қаласында қарсы алады. Елге тек 1950 жылы оралды.
Соғыстан кейінгі бейбіт өмірде трактор бригадасын басқарды, есепші болды, фермада басшылық қызмет атқарды. Екі ұл мен алты қыз тәрбиелеп өсірген абыз қария бүгінде 21 немере мен 3 шөберенің атасы.
Ол ІІ дәрежелі «Отан соғысы» орденімен, сондай-ақ «Ерлігі үшін», «Варшаваны азат еткені үшін», «Германияны жеңгені үшін» сынды бірнеше медальмен марапатталды.
Фото: Шымкент қаласы әкімінің баспасөз қызметі
