Әкім Сұлтанғазиев жұмсақ креслода отыр, ал оқушыға орындық та жоқ
Алматы облысындағы Жетіген ауылының мектебінде бастауыш сынып оқушылары сабақты тікесінен тік тұрып оқуға мәжбүр
Ақпарат агенттіктері таратқан хабарға қарағанда, мұндай жағдайға ашулы ата-аналар шу көтерген. Өйткені мектепте оқушы отыратын орындық жетіспейді, ал сынған жиһазды жөндеуді ата-ананың мойнына жүктеген.
«Жағдайды айтып түсіндіру қиын. Егер қарапайым жағдайдың өзі жасалмаған болса, онда біздің балаларымыз қалай білім алады? Балалар үйге келгенде сабақтың жартысына дейін қалай түрегеп тұрып оқып, жазғандарын айтады. Бала қайтіп сабақты түсінсін, мұндай жағдайда? Ол аз десеңіз, сынған орындықты жөндеуді бізден өтінеді. Бұлай өтініш жасаулары бір түрлі емес пе!» депті ата-аналар.
Іле аудандық білім басқармасындағылар мәселемен танысыпты және оның шешілуін қадағалайтын болыпты.
Айта кетерлігі, Алматы облысындағы орындық тапшылығы бұл ғана емес. Жетісу облысы жаңарып, Алматы облысының орталығы Қапшағайдың жағалауына көшкен кезде қала әкімдігінің ғимаратына орналасқан облыс әкімдігі аппаратының қызметкерлері де кезінде отыратын орындық таппай қалған еді. Бірақ, шенеуніктер бұл мәселені тез шешті. Бір казиноның ғимаратын 3 миллиардтан астам теңгеге сатып алды, тағы сондай соммаға жөндеу жұмыстарын жүргізіп, көшіп кіріп алды. Қазір облыс әкімі Марат Сұлтанғазиев пен оның командасы жайлы да жұмсақ креслода отыр.
Ал түрегеп тұрып сабақ оқитын бастауыш сынып балаларының мәселесі осы оқу жылында шешілмейтіндей. Қыркүйекке дейін реттейміз депті.
Жалпы, Алматы облысында елуден астам үш ауысымдық мектеп бар. Одан бөлек жүзден астам мектеп 1940 жылдары салынған бұрынғы пошта немесе контора сияқты ескі жертөле ғимараттарда білім беріп жатыр.
Есесіне облыс әкімдігінің ғимараты Қонаев қаласындағы ең әдемі ғимараттың бірі болып тұр.
Біздің әлеуметтік желімізге тіркеліп, әр нәрседен мәлім болып жүріңіз:
Байланысты жаналықтар
MalimBlocks
