Діни радикализмге заңмен қатаң тыйым салатын кез жетті 

Онда ол діни радикализмге заңмен тыйым салатын кез жетті деді. Ол 2011 жылы бұл мәселені билік те қолдағанын, бірақ Ұлттық қауіпсіздік комитеті ғана қарсы болғанын айтты.

-Билік те қолға алып, барлық министрлік пен Бас прокуратура мен Жоғары сот та қолдағанда, қай орган қарсы болды?!. Тек Ұлттық Қауіпсіздік комитеті қарсы шығып, осы тыйым салу заңға енбей қалды. Мен мұны сол уақытта Ұлттық Қауіпсіздік комитеті ұйымдастырған конференцияда  «Радикалдық теріс ағымдарға қарсы заң қабылдауға тек сіздер ғана қарсы болдыңыздар! Арамшөптің тамырын жоймаса, тек бетін ғана шапқан болса, ол қайта қаулап шыға береді. Сіздер осылай елді алдап келесіздер!» – деп, ашық айттым,-дейді депутат Қазбек Иса.

Ол бұдан кейін ”Қазақ үні” газетіне “Ұлттық қауіпсіздік комитеті - ұлтқа қауіпті комитет пе?”-деген тақырыпта мақала жазғанын айтып өтті.

-Енді сол күдігіміз кешегі Қаңтар қасіретінде расқа айналды. 2009 жылы да дін заңына өзгерістер енгізілетін болып, біз “Қазақ үні” газетінде Діни басқармамен бірігіп, заңға діни ағымдарға тыйым салатын бап енгізу мәселесін көтердік. Бірақ соның өзінде біздің сол кездегі солқылдақ билік осы тыйым салу бабын енгізе алмады. Сол кездерде  сол заңдар қабылданғанда, содан кейінгі, ақыры Қаңтардың қанды қасабына  айналған небір қайғылы оқиғалар, бір ұлттың діни теріс ағымдар арқылы екіге бөлінуі секілді қасіреттер болмас еді,-деді Қазбек Иса.

Мәжілісімен қазір  ән әлемінде, айтыста, спортта да тайраңдап жүрген жат ағымның өкілдері дінді жамылып алып, әріптестері мен әнсүйер, жанкүйерлеріне өз «салттарын» кіргізіп жатырғанын да айтты.

 -Өткен 30 жылдық теріс саясат қазақтың  «нұр» деген жалынды сөзін жағымсыз сөзге айналдырса, теріс діни ағымдар тіпті,  ең қымбат, ана деген аяулы атпен қатар аталатын «Шеше» деген қастерлі атауға қара күйе жағып, «ұстаз» деген ұлағатты ұғымның мәнін құртты. Діни теріс ағымдағылар елді екіге бөліп, мылтықсыз-ақ мыңдаған жастарымызды қазақтың қатарынан шығарып қана қоймай, ұлтты жою үшін елге қарсы қауіпті күштерге айналдырып жатыр. Дінге, тілге, жерге қарсы елбұзар теріс ағымдардың бәріне заңмен тосқауыл қойылуы тиіс! Ел үшін ең қымбат ұлтқа, адам үшін ең аяулы - Әке-Шешеге, Қазаққа  ең адал Домбыраға қарсы харам пиғылдылардың еркін тарап  жатқан ел түбіне жетер вирусын шұғыл заңмен тоқтататын кез жетті! Ұлттық мүддеміз бен дәстүрімізге, ел бірлігіне балта шауып, Мемлекетке тағы да қатер төндіріп жатқан  Діни теріс ағымдарға заңмен қатаң тыйым салу қажет! Бұдан кейін кеш болады!,-деп сөзін түйіндеді мәжіліс депутаты Қазбек Иса.