Сапарбаев та кетті
Жамбыл облысының әкімі Бердібек Сапарбаев қызметінен босатылды. Бұл туралы Ақорда хабарлады.
Облыстың жаңа әкімі болып Сапарбаевтың орынбасары Нұржан Нұржігітов тағайындалды.
Бердібек Сапарбаев Жамбыл облысының әкімі болып Қордай маңындағы Масанчи ауылында болған ұлтаралық наразылықтан кейін тағайындалған еді. Оған облыстағы жағдайды тұрақтандырып, өзара келісім орнату жұмысы тапсырылған. Оқиға салдарынан 11 адам қайтыс болып, 25 қылмыстық іс қозғалған. Сапарбаев әр жылдары Ақтөбе облысы, Шығыс Қазақстан облысы, Оңтүстік Қазақстан облысы мен Қызылорда облысының әкімі болған. Оның қызметтен не үшін кеткені және қандай қызметке ауысқаны туралы әлі ақпарат жоқ.
Оқи отырыңыз: Қордай қақтығысы: Қираған үй жаңарды, ал көңілдегі жара жазылды ма?
2019 жылы президент Қасым-Жомарт Тоқаев Тараздың экс-әкімі Қайрат Досаевты табиға ресурстарды басқару департаментінің басшысы етіп тағайындағаны үшін Бердібек Сапарбаевқа сөгіс жариялаған.
Оқи отырыңыз: Тоқаев Сапарбаевқа сөгіс жариялады
Облысқа жаңа тағайындалған жаңа әкім Нұржан Нұржігітов осы кезге дейін тек Жамбыл облысында қызмет еткен. 2021 жылдың сәуірінен бастап облыс әкімінің орынбасары болған.
