Сыртқы істер министрінің бірінші орынбасары тағайындалды
Ақорда Ержан Ашықбаевтың Сыртқы істер министрінің бірінші орынбасары лауазымына тағайындалғанын хабарлады.
Мемлекет басшысының өкімімен Ержан Нигматоллаұлы Ашықбаев Қазақстан Республикасы Сыртқы істер министрінің бірінші орынбасары лауазымына тағайындалды, - делінген құжатта.
Айта кетейік, Ержан Нигматоллаұлы 1974 жылғы 16 маусымда Алматы қаласында туған.
1998 жылы әл-Фараби атындағы Қазақ мемлекеттік ұлттық университетін, 2012 жылы Гарвард университетінің Дж.Кеннеди атындағы мемлекеттік басқару мектебін тәмамдаған. Мамандығы — халықаралық қатынастар, мемлекеттік басқару магистрі.
Дипломатиялық қызметін 1998 жылы ҚР Сыртқы істер министрлігінің Төртінші департаментінде референт болып бастаған.
1999-2007 жылдары министрліктің орталық аппаратында әртүрлі қызметтер атқарған және Қазақстанның Бельгиядағы елшілігінде іссапарда болған.
2007-2011 жылдары Сыртқы істер министрлігінің Халықаралық ақпарат комитетінің төрағасы, ерекше тапсырмалар жөніндегі елші лауазымдарын атқарды.
2012 жылы ҚР Премьер-Министрі Кеңсесі басшысының орынбасары, ҚР Үкіметінің ресми өкілі болды.
2012-2013 жылдары ҚР Президенті Әкімшілігінің Сыртқы саясат орталығын басқарды.
2013-2021 жылдары ҚР Сыртқы істер министрінің орынбасары қызметін атқарды.
2021 жылдан бастап осы тағайындауға дейін Қазақстан Республикасының АҚШ-тағы Төтенше және Өкілетті Елшісі болды.
Ержан Ашықбаев — дипломатиялық қызметтің кәсіби өкілі, Төтенше және Өкілетті Елші дипломатиялық дәрежесіне ие. Ағылшын, түрік және француз тілдерін меңгерген.
Фото: Ақорда
