Жақында ғана Ресейдің «Спутник-V» вакцинасын салдырған президент Қасым-Жомарт Тоқаев алдағы уақытта қазақстандық QazCovid-in вакцинасын салдыруға да ниетті.
Бүгін мемлекет басшысының баспасөз хатшысы Берік Уәли Қасым-Жомарт Тоқаевтың не себепті отандық емес, ресейлік вакцинаны салдырғанын түсіндірді. Ол өзінің Facebook парақшасында президенттің қазақстандық ғалымдарға сенетінін және алдағы уақытта QazCovid-in вакцинасын салдыруға ниетті екенін жазды.
"Азаматтарымыз әлеуметтік желілерде Мемлекет басшысының бұған дейін қазақстандық вакцина салдырамын деп, бірақ оны күтпей, «Спутник-V» екпесін алғаны жөнінде сұрақтар қоюда. Президенттің әрқашан да отандық өнімді қолдайтынын сенімді түрде айта аламын. Қасым-Жомарт Тоқаев Қарағандыда шығарылған вакцинаны салдырды және біздің ғалымдарға толық сенеді. Қазақстандық вакцина өндірісі іске қосылғаннан кейін Мемлекет басшысы Жамбыл облысына барып, кәсіпорынның жұмысымен арнайы танысуды жоспарлап отыр. Президент келесі жолы коронавирусқа қарсы отандық екпені салдыруға ниетті", - деді Уәли.
Қаңтар айында Қасым-Жомарт Тоқаев «қазақстандық QazCovid-in сынақтан сәтті өтетін болса, отандық вакцинаны салдыратынын» айтқан. Бірақ арада екі ай өткен соң, сәуірдің 6-ы күні оның Ресейдің «Спутник-V» вакцинасын салдырғаны белгілі болды. Осыдан кейін елде Қазақстан вакцинасына деген сенімсіздік одан сайын өршіген.
QazCovid-in вакцинасы шығарылады деп жоспарланған Жамбыл облысында салынып жатқан жаңа зауыттың құрылысы әлі біткен жоқ. Жақында Биологиялық қауіпсіздік мәселелері ғылыми-зерттеу институтының бас директоры Күнсұлу Закария «QazCovid-in вакцинасын құюға Қытайдан 3 миллион дана бос флакон сатып алынғанын» мәлімдеген.
Қазақстанда коронавирусқа қарсы жаппай вакцинация 2021 жылдың 1 ақпанында басталған. Осы уақытқа дейін Республика бойынша 200 мыңнан астам адамға екпе салынған.
